BSAC Struggling For Knowledge And Unity 
ا2 استپان ماتیں زبانانی میان استمانی روچ ءَ مبارک قاضی ءِ نام ءَ پسنی ءَ مزنیں مراگاھے ءُ ایدگہ کُلیں ھنکیناں مراگش اڈ دیگ بیت۔
بلوچ اسٹوڈنٹس ایکشن کمیٹی
ا2 استپان(فروری) ماتیں زبانانی میان استمانی روچ ءِ درگت ءَ ” گال اَنت کہ گپتار بنت، گپتار بنت کردار” ءِ سرھال ءَسرجمیں ھنکیناں ھوار پسنیءَ مراگش اڈ دیگ بیت۔ مبارک قاضی بلوچ راج ءِ یک نمیرانیں کارستے کہ آہی ءِ جھد پہ بلوچ راج ءُ زبانءَ مدام راج دپتر ءَ مانیت ، واجہ ءَ ستا پیش کنان ءَمیان استمانی ماتیں زبانانی روچ ءَ واجہ مبارک کازیءِ نام ءَ ندر کنیں ءُ گل ءِ سرجمیں ھنکیناں مراگش اڈ دیگ بیت اِنت۔ مستریں مراگاھ مبارک قاضی ءِ ھند پسنی ءَ برجم دارگ بیت کہ آئی ءِ تہ ءَ مبارک قاضی ءِ زند ءَ ھوار جتا جتائیں لبزانکءُ زبانءِ سرءَ بھر ھوار اَنت۔دومی ایدگہ کُلیں ھنکیناں مراگش اڈ دیگ بیت ءُ زبان ءُ زبان ءَ گوں بندوکیں سرھالانی سرءَ پینل ڈسکیشن، تران ءُ کسمانک ھوار بنت۔
اے روچ کہ چہ یونیسکو ءِ نیمگءَ ماتیں زبانانی رکینگ ءَ پہ نامینگ بیتگ ءُ سرجمیں دنیا ءَ ہمے ھوالہ ءَ مراگش بیت ءُ زبانانی رکینگ ءُ جیڑہانی سرءَ توجیل سازگ بیت۔ بلوچ اسٹوڈنٹس ایکشن کمیٹی راجی نودربر ادارہ یے ءِ بستارءَ ہمک سال اے روچ ءَ برجاھ داریت داں بلوچ راج ءِ ماتیں زبانانی رکینگ ءُ آہانی جیڑہانی سرءَ نوکیں توجیل دیم ءَبیاریت۔ ادارہ ءِ پہ بلوچ راج ءِ ماتیں زباناں جھد مدام برجاھ اِنت کہ آئی ءِ تہ ءَ گل ءِ لٹریچر گام ءُ نوشت مستریں درور اَنت کہ وتی ماتیں زبان بلوچی ءُ براہوئی زباناں چاپ ءُ شِنگ کنگ بیگءَ اَنت۔ادارہ ءِ سِتک انت کہ یک راج ئے ءِداں زبان رکینگ ءُ دیمروئی دیگ مہ بیت آ راج گُنگ ءِ ھسابءَ بیتءُ آہی ءِ راج دوستی نیم شلونگ بیت۔پمیشکا زبانانی رکینگ راجدوستی ءِ بنیاتی بھراں چہ یکے ءُ اے ھوالہ ءَ جھد کنگ مئے بنیاتی کاراں ھوار اِنت۔
روچ 21 استپان ماتیں زبانانی میان استمانی روچ ءَمبارک قاضی ءِ نام ءَ پسنی ءَ مزنیں مراگاھے ءُ ایدگہ کُلیں ھنکیناں مراگش اڈ دیگ بیت۔ ماتیں زبانانی میان استمانی روچ ءَ مراگش اڈدیگ ءَ ھوار میان استمانی ماتیں زبانانی روچ ءُ بلوچی زبان ءِ سرءَ نبشتگیں یک پٹ ءُ پولی کِتابکے ہم ہمے روچءَ چاپ ءُ شِنگ کنگ بیت اِنت ۔ اے روچ ءِ ھوالہ ءَ کتابک شنگ کنگ ءَ ھوار زبان ءِ سرءَ ڈاکومنٹری یے ہم پیش کنگ بیت اِنت۔
بنجاہی جارکش بلوچ اسٹوڈنٹس ایکشن کمیٹی
