BSAC Struggling For Knowledge And Unity 
بلوچ اسٹوڈنٹس ایکشن کمیٹی گْوادر ھنکین جوڈ کنگ بیتگ۔
شاہ جان بلوچ آرگنائز ءُ ولید بلوچ ڈپٹی آرگنائزر گچین کنگ بیتگ اَنت۔
بلوچ ورنایانی راجی زمہ واری اِنت کہ راجی جیڑہانی دیم ءَ بہ اوشت اَنت ءُ آہانی ہلاپ ءَ عملی جہد بہ کن اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی گْوادر ھنکین ءِ ھنکینی آرگنائزنگ باڈی دیوان گل ءِ بُنجاھی کمیٹی ءِ باسک سنگت بالاچ بلوچ ءِ سروکی ءَ برجم دارگ بیتگ۔ دیوان ءِ ھاسیں مہمان بنجاھی کمیٹی ءِ باسک سنگت فوزیہ بلوچ، سلیم بلوچ ءُ عامر بلوچ بیتگ اَنت۔ دیوان ءَ جتائیں بُنگپ کہ آیانی تہ ءَ بنجاھی سرکیولر، تنظیمی امور، ھندی ءُ میان استمانی سیاسی جاورھال ءِ سرءَ گوں دلجمی ءَ باوست ءَ پد آؤکیں گامگیج ءِ تہ ءَ گْوادر ھنکین ءِ آرگنائزنگ باڈی ءِ ھاتر ءَ سنگت گچین کنگ بیتگ اَنت۔
بنجاہی سنگتاں تران کناں ءَ گوْشت کہ گوادر ھنکین ءِ جوڑ بوگ پہ بلوچستان ءِ تیاب دپی دمگاں نیکیں پالے۔ گوادر کہ میان استمانی کاروبار ءِ بنجل زانگ بیت بلے بژنی گپ ایش اِنت ھمے شھر ءِ تہ ءِ جاہمنندیں ورنا جتا جتائیں جیڑہ ءُ جنجالانی آماچ اَنت چوشکہ نشہ ءِ وڑیں سِلکاری، وانگی ادارھانی غیر فعالی ءُ کمی، یا کسان عمری ءَ معاشی جیڑہانی سبب ءَ چہ وانگ ءَ سدگ وتی تہءَ مزنیں المیہ اَنت۔ اے سرجمیں جیڑھانی سرپد بوگ ءَ پد نودربر گل ئے ءِ بستارءَ مئے راجی زمہ واری بیت کہ ما ایش جیڑھانی دیم ءَ بہ اوشت ایں ءُ پہ وتی ورناھاں سیاسی ءُ زانشتی چاگردے جوڑ کنگ ءِ جہد بہ کن ایں۔
دیمترءَ دیوان ءَ ساڑی ئیں سنگتاں تران کنان ءَ گوࣿشتگ کہ مزنیں مدتے بیت گْوادر ءَ نودربر سیاست جتائیں پندلانی بنیات ءَ اوشت آماچ کنگ بیتگ ءُ گْوادر ءَ راجی ادارہانی دیمءَ وڈ وڈیں جیڑہ ءُ جنجال آرگ بیتگ اَنت کہ آیانی سبب ءَ نودربر ءُ ورنا وتی راجی زمہ واریاں چہ گستا بیتگ اَنت بلے گوستگیں سالاں چہ بساک ءِ مُدام جہد بیتگ کہ وتی پروگرام ءَ ادءِ ورناھاں سر بہ کنت۔ ادارہ ءِ سنگتانی مزنیں جہدے ءَ پد مروچی بساک گْوادر ھنکین جوڈ کنگ بیتگ، نی ادارہ وتی مہکمیں پروگرام ءَ گوں اے جہد ءَ کنت کہ گْوادر ءِ ورناھانی وانگی ءُ پگری ھیلکاری ءَ بہ کنت ءُ گْوادر ءِ تہ ءَ شریں وانگی ماھولے بہ ٹہین ایت داں ادءِ ورنا ءُ نودربر وتی راجی زمہ واریاں سرپد بہ بنت ءُ بلوچ جُنز ءِ بھر بہ بنت
جتائیں بُنگپانی سرءَ گوں دلجمی ءَ تران ءَ پد دیوان ءِ گُڈی بُنگپ آؤکیں گامگیج ءِ تہ ءَ ھنکینی آرگنائزنگ باڈی ءِ ھاتر ءَ سنگت گچین کنگ بیتگ اَنت۔ نوک گچین بیتگیں کابینہ ءَ شاہ جان بلوچ آرگنائزر، ولید بلوچ ڈپٹی آرگنائز، حنیف بلوچ، چاکر بلوچ ءُ سمیر بلوچ آرگنائزنگ باڈی ءِ باسک گچین کنگ بیتگ اَنت۔ دیوان ءِ گُڈی بھر سوگندی بھر اَت کہ بُنجاھی سنگت ءَ نوک جوڈ بیتگیں ھنکینی کابینہ ءِ سنگت سوگند دات اَنت ءُ آئی ءَ پد دیوان ءِ ھلاسی ءِ جار جنگ بوت۔
بنجاہی جارکش بلوچ اسٹوڈنٹس ایکشن کمیٹی
