BSAC Struggling For Knowledge And Unity بلوچ اسٹوڈنٹس ایکشن کمیٹی مستونگ ہنکین نا نیمہ غان اسہ ہیلکاری دیوان اس ہنکینی آرگنائزر میر احمد بلوچ نا کماشی ٹی اڈ تننگا دیوان نا مہمان خاص بنجائی کمیٹی نا باسک عامر بلوچ ئس۔
دیوان نا سرحال: بلوچ راجدوستی نا جنز 1920-1948
تران کروک: اعجاز بلوچ
سنگت دیوان نا بِنا ءِ راجدوستی نا تعارف آن کرے اوکان پد سنگت بلوچ راج دوستی نا تعارف کریسہ پارے کہ بلوچ راج دوستی ءِ 1920 آن الیس 1948 نا دیہاڑ ئٹی بھاز بھلو ارزشت اس ارے بھاز آ زانت کار آک پارہ اندنکہ اینو برجاء آ پنچمیکو راجی جنز نا ارے بھاز آ زانت کار آک 1920 آ بنا مروکا جہدوجہد ءِ ماڈرن نیشنل ازم ام پارہ۔ و بھاز آ زانت کار آک پارہ بلوچ راج دوستی نا رویہ 1920 ئتون تفوک ءِ 1920 ئٹی اولیکو وار بلوچ راج برطانیہ نا کالونائزیشن نا خلاف اسہ سیاسی گل اس جوڑ کرے دن اف کہ 1920 آن مُست بلوچ زورگر نا خلاف ہچ وڑ نا مزاحمت اس کتنے یا بلوچ تینا ڈیہہ کن بش متنے اندنکہ کہ 13 نومبر 1839 آ انگریز اولیکو رند بلوچستان آ بریک گڑا خان قلات میر محراب خان مزاحمت کیک انگریز نا خلاف۔
سنگت مُستی پارے کہ بیستمیکو صدی ٹی بلوچ ورناک خواننگ کن کارہ سردار نا خاہوت نا بڑزکو مڈل کلاس نا ورناک مریرہ گڑا اندا ورناک خواننگ آن واپس بریرہ گڑا ینگ بلوچ نا پن آن سیاسی گل اس جوڑ کیرہ دا بلوچ آتا اولیکو سیاسی گل مریک اندا ینگ بلوچ نا ورناک مونا انجمن اتحاد بلوچاں، و قلات اسٹیٹ نیشنل پارٹی ءِ جوڑ کیرہ اندا بلوچ تحریک ئٹی بلوچستان نا ورناک اوار ئسر، داٹی خان آف قلات نا خاہوت آن اعظم خان احمد یار خان، آغا عبد الکریم، یوسف عزیز مگسی، عبد الرحمن بگٹی، شہباز خان، عبدالعزیز کرد، غوث بخش بزنجو، محمد حسین عنقا بابو عبد الکریم اوار ئسر اندا بندغ آک برطانیہ نا سرداری نا خلاف ئسر، برطانیہ تینکن قبیلہ نا سردار جوڑ کریسس ہرا انجمن اتحاد بلوچاں و قلات اسٹیٹ نیشنل پارٹی نا خلاف ئسر۔
سنگت تران کریسہ پارے کہ یوسف عزیز مگسی راجی جنز نا راہشون 1920 ئٹی راجی جنز ءِ بنا کروکا یوسف عزیز مگسی راجدوستی نا بانی پاننگک، یوسف عزیز مگسی نا ادبی کاریم تیان بلوچ قوم ءِ تینا راجی زمہ واریک سرپند مسر 1929 ئٹی یوسف عزیز مگسی تینا اولیکو کتاب فریاد بلوچستان ئٹ بلوچستان نا آجوئی نا خواست ءِ کیک و کتاب ئٹی سر شمس نا حکومت نا زی آ تنقید ہم کیک۔ 1929 ئٹی یوسف عزیز مگسی قید مریک۔ 1933 ئٹی ’بلوچستان کی آواز‘ ءِ شنگ کیک و داٹی سیاسی حالیت آتے درشان کیک۔ ینگ بلوچ نا پن1931 ئٹی انجمن اتحاد بلوچاں مریک۔ دا گل غیر قبائلی سیکولر و انقلابی سیاسی پارٹی اس ئس۔ گل نا خواست آک تیوی بلوچستان ءِ اوار کننگ، بلوچ قوم ءِ برطانیہ آن آجو کننگ و سرداری نظام ءِ ایسر کننگ۔
سنگت نا ہیت آتیان پد سوج و ورندی تا بشخ بناء مس ہراٹی دیوان ئٹ ساڑی سنگتاک تینا سوج آتے کریر و سنگت اعجاز بلوچ اوفتے است جمی ئٹ ورندی تس۔ اوکان پد کماش نا موکل ئٹ دیوان ایسر کننگا۔
