بساک کراچی ھنکین ءِ ھنکینی ھیلکاری دیوانے برجم بیتگ

رمس 31 مئی 2024 ءَ بلوچ اسٹوڈنٹس ایکشن کمیٹی کراچی ھنکین ءِ مزنیں ھیلکاری دیوانے ھنکینی کارمستر زکریہ بلوچ ءِ سروکی ءَ برجم دارگ بوت، دیوان ءِ ھاسیں مہمان بُنجائی ھالرسانی کارگُشاد‌ اُزیر بلوچ ءُ بنجاہی کمیٹی ءِ باسک شیراز بلوچ بیتگ اَنت۔
سرھال
Propaganda in Liberal Democracy
ترانکار: اُزیر بلوچ ( بُنجاھی ھالرسانی کارگُشاد )
دیوان ءِ بندات ءَ سنگت ءَ تران کنان ءَ گُشت کہ پروپیگنڈہ ہما عمل ءَ گوْش اَنت کہ ایشی ءِ وسیلہ ءَ یک مقصدے ءِ ھاترا مردُماں وتی نیمگ آرگ ءُ آہاں وتی مکسد ءُ عمل ءَ منارینگ دانکہ تئی مقصد سرجم بہ بیت۔ مئے نزّ ءَ پروپیگنڈہ ھمُک وھد ءَ ھراب پیش دارگ بوتگ بلے پروپیگنڈہ شر ھم بوت کنت ءُ ھراب ھم بوت کنت۔ اے ہمے عمل اِنت کہ سیاسی لبزاں گوں پروپیگنڈہ گُشگ بیت ءُ مزھبی لبزاں گوں تبلیغ گُشگ بیت۔
دیمترءَ سنگت ءَ پروپیگِنڈہ ءِ پُشدرءِ سرءَ تران کنان ءَ گُشت کہ ھبدھمی کرن ءَ وھدے یورُپ ءِ تہ ءَ چرچ زور ءَ بنت گُڑا کیتولِک لیکہ ءِ منوگر وتی لیکہ ءَ مہلوک ءَ سر کنگ ءِ ھاترءَ پروپیگنڈہ کن اَنت ءُ لس مہلوک ءِ زہنیت ءَ وتی نیمگ ءَ کار اَنت بلے اے وھد ءَ پروپیگنڈہ ”پریچ“ ءِ وسیلہ ءَ کنگ بیت۔ ھمے داب ءَ داں نوزدھمی کرن کہ بیت گڈا اے وھد ءَ پروپیگنڈہ سیاسی عمل ءِ تہ ءَ کارمرز کنگ بیت۔ ھمے وھد ءَ اولی ءُ دومی جہانی جنگ بنت ءُ پروپیگنڈہ سک باز کارمرز کنگ بیت۔ اے میان ءَ جتائیں وسیلہاں گوں پروپگنڈہ کنگ بیت پہ درور تامرُ جوڈ کنگ، پوسٹر جوڈ کنگ، وال چالکنگ، شئیر نبشتہ کنگ ءُ جنگ، ہالتاکاں وتی سوبینی آں مہلوکءَ دیمءَ ایر کنگ ءُ کتاب نبشتہ کنگ ہوار بنت۔ امریکہ‌ ءِ لشکر پوسٹر جوڈ کنت ءُ انکل سیم نامیں مردمے لنکُک شہار دیگ اِنت ءُ گوْشگ اِنت کہ ‘I want You To US Army” اے پروپگنڈہ ءِ دابے داں ھُمک مردُم ءِ زہن ءَ نکش بہ بیت کہ فوج ءَ تئی درکار اِنت ءُ ھمے وڈءَ ہٹلر ءُ ایدگہ ھم کارمرز کن اَنت۔ پروپیگنڈہ الگ الگ داب ءَ کارمرز کنگ بیت بزانکہ تامور ءُ اکس بہ بنت، پُچ ءُ پوشاک بہ بنت، نشان بہ بنت، لبز ءُ گپ بہ بنت۔
پروپیگنڈہ ءِ دو تہرءَ کنگ بیت۔ یکے سپورٹِنگ پروپیگنڈہ اِنت ءُ دومی انڈرمائینگ پروپیگنڈہ اِنت۔ وھدے کہ پروپیگنڈہ یک چیزے یا مُلکے ءِ تچکءَ پلہ مرزی ءَ بہ بیت گُڑا ایشی ءَ سپورٹِنگ پروپیگنڈہ گوْش اَنت۔ بہ زاں اشی ءِ تہ ءَ چہر ءُ دگہ چیریں لبز نہ بنت بلکیں تچک ءَ یک چیزے ءِ ھکءَ پروپگنڈہ کنگ بیت۔ وھدے یک چیزے ءِ بابتءَ پروپگنڈہ کنگ بہ بیت بلے تچک مہ بیت بہ زاں زاہر ءَ ہما مکسد ءِ بابتءَ ھرابیں گپّے بہ بیت بلے اشی ءِ تہ ءَ وت ہما عمل ءِ پروپگشین بہ بیت ءُ مردُماں سر بہ بیت گُڑا ایشی ءَ گوْش اَنت انڈرمائینِگ پروپیگنڈہ۔
دیمترا سنگت ءَ لبرل ڈیموکریسی ءِ سرا تران کنان ءَ گُشت کہ لبرل‌ ڈیموکریسی ءِ سرپد بیگ ءِ ہاترءَ یکبرے لبرل اِزم ءِ مطلب ایش اِنت کہ ھَمُک نپر ءَ آئی ءِ نپری ھک بہ رس اَنت ءُ آئی ءِ زِند، مال ءُ زِند ءِ ایدگہ سرجمیں ھک پاہازگ بہ بنت۔ ہمے ہساب لبرل ڈیموکریسی ءِ تہ ءَ ہما نظام گیشتر مہلوک ءِ دست ءَ بیت ءُ اودءَ استان ءِ تاگت ءُ زور کم بنت، استان ءَ تاگت مہلوک ءِ دست ءَ بیت ءُ ہرچ نپر وتی تہ ءَ وت تاگتے بیت کہ سرجمءَ نظام ءَ جُنزین ایت۔ اودءَ ھرکس ءَ ھرچیز کنگ ءِ ھک اَست بلے چاگرد ءُ مُلک ءِ کانود ءِ تہ ءَ پہ درور آ مردُمے بہ بیت یا کارگسے یا کمپنی ئے بہ بیت۔ لبرل ڈیموکریسی ءِ تہ ءَ سرجمیں تاکت لس مہلوک ءِ دست ءَ اِنت اودا سرکار ءِ دست کم رسیت، اگاں سرکار انچیں ہرابیں کردے بہ کنت گُڑا مھلوک اے گپ ءَ جت کُت کنت کہ ما ترا سرکار کُتگ کہ بیا مئے سرا ھاکمی بہ کن گُڑا ترا مئے ھک پہازگی اَنت ءُ زلورت پورا کنگی اَنت۔ 1991 ءَ وھدے سوئیت یونین پروشیت گڈا فوکواما مردے کتابے نبشتہ کنت “ End of History” اے کتاب ءِ تہ ءَ اِش نبشتہ بیت نی دنیا ءِ تہ ءَ دگہ لیکہ نئیت ءُ لبرل ڈیموکریسی ءَ باج بُرتگ نی ہمے مان ایت ءُ دگہ اِچ لیکہ نہ بیت تہنا لبرل ڈیموکریسی بیت بلے مرچی وڈے نہ وڈے ءَ اے گپ رد بیتگ ءُ مارا اے لیکہ سرجمیں دُنیا ءِ سرءَ ھاکمی کنگ ءَ گِندگ ءَ نئیت اِنت۔
دیمترا سنگت ءَ تران کنان ءَ گُشت کہ بلوچ ءَ ہم پہ وتی مکسد ءَ منارینگ ءُ تالان کنتءَ پروپگنڈہ ءِ عمل زُرتگ ءُ جوانیں ڈولے ءَ زُرتگ ءُ بلوچءِ گُورءَ پروپیگنڈہ پہ بلوچ ءِ راجی جوڈشت ءِ دیمءَ برگ ءِ ھاترا کارمرز کنگ بوتگ ءُ انگت کنگ بُوّگ ءَ اِنت۔ بلوچ ءَ جتائیں وسیلہ ءَ وتی لیکہ ءُ بیانیہ ءَ مہلوک ءَ سر کُتگ بلے بلوچ ءِ ہلاپ ءَ ہم بازیں ردیں پروپگنڈہ ئے بیتگ ءُ انگت بیگ اِنت پہ درور اے گپ کہ بلوچ ءُ بدروچ، بلوچ نہ بنت، بلوچ وتی دُژمن وت اَنت، بلوچانی دُژمن سردار اَنت، بلوچ نہ زانتکار ءُ بے وانندگ اَنت، سیاست شر نہ اِنت، سیاست وانگ ءَ ھراب کنت ءُ دگہ بازیں گپ ءُ جملہ کہ بلوچ ءِ ہلاپ ءَ کارمرز کنگ بیگ ءَ اَنت۔ اے کُلیں شئے پروپیگنڈہ ءِ عمل ءِ تہ ءَ کائینت۔ بلے اے کُلیں گپاں پد پدا ہم زانگ بیت کہ بلوچ ءِ پروپیگنڈہ ءِ عمل مہکم اِنت پرچاکہ بلوچ ءِ پروپگنڈہ ءَ راستی ئے گون ءُ بلوچ جہدکار ہمے راستی ءَ شِنگ ءُ تالان کنگءَ اَنت، دروگ نہ اَنت۔ بلوچ ءِ تہ ءَ پُچ، لبز، گپ، اکس، نشان، آرٹس، سوت، چاگردی رسانکدر ءُ دگہ بازیں چیز اَنت کہ بلوچ ءِ پروپیگنڈہ ءِ تہ ءَ ھوار اَنت ءُ بلوچ ءِ بیانیہ ءَ دیمءَ بران اَنت۔
گُڑ سرءَ سنگتاں وتی جُست ایر کُت اَنت، جُستانی پسّو دیگ ءَ پد کارمستر ءِ رزا ءَ چہ دیوان ءِ ھلاسی ءِ جار جنگ بوت۔