BSAC Struggling For Knowledge And Unity بلوچ اسٹوڈنٹس ایکشن کمیٹی ڈی جی خان ہنکین ءِ ہیلکاری دیوان۔
بلوچ اسٹوڈنٹس ایکشن کمیٹی ڈی جی خان ہنکین ءِ ہیلکاری دیوانے ہنکینی کمک کارمستر راز بلوچ ءِ سروکی ءَ برجم دارگ بوت، دیوان ءِ ہاسیں مہمان بنجائی ہالرسانی کارگشاد اُزیر بلوچ بیتگ۔
سرہال: کالونیلزم ءُ نیوکالونیلزم
تران کار: بنجائی ہالرسانی کارگشاد اُزیر بلوچ
سنگت ءَ دیوان ءَ گالوار کنان گوُشت کہ کالونیلزم ءِ بزانت اِنت کہ وہدے یک دریں تاگتے زور یک استان یے ءِ سر ءَ بئیت ءُ آئیءِ حکومت ءَ پچ بہ گیپت ءُ آ راج ءِ زمین، دودءُ ربیدگ، زبان، سیاست ءُ ایدگہ کُل شئے آں ایردست بہ کنت ءُ اودءَ کبزہ بہ کنت۔ چوناہ ءَ اشی ءِ لبزی بزانت چہ کالونی ءَ درتکگ بہ زاں نوکیں آباتی۔ پیش مسیح ءَ ءُ آئی ءَ رند وہدے نوکیں آباتی آبات کنگ بیتگ گڈا کالونی گوْشگ بیتگ اَنت۔ بلے اے کالونیلزم کہ دنیا ءَ ھترناکیں دروشمے ءَ اتکگ ءُ ملکانی سر ءَ کبزہ کتگ، اِش کالونیلزم ءِ بندات پانزدہمی کرن ءَ بیت۔ اے وھد ءَ زوراوریں استاناں دومی استان ءُ راج ایر دست کتگ انت ءُ آوتی کالونی جوڑ کتگ اَنت۔ کالونیلزم یک انچیں عملے کہ وھدے کالونیل تاکت یک راجے ایر دست کنت گڈا آ وتی قبضہ ءَ برجم دارگ ءَ پہ ھرچ وڑیں پندل سازی کنت۔ ایردستں راج ءِ دودءُ ربیدگ بہ بیت، راجدپتر بہ بیت، نفسیات بہ بیت یا کہ زبان بہ بیت اے دراہاں مسخ ءُ تباہ کنت ءُ پدا اشاں وتی وڑءَ جوڑ کنت دانکہ قبضہ گیر ءِ قبضہ مہکم بہ بیت ءُ آ وتی لٹ ءُ پل ءَ برجم بہ داریت۔ یک راجے ءِ ایردستی ءَ دو مزنیں طریقہ کارمرز کنگ بیت کہ ایشی ءَ چہ ہما راج ایردست کنگ بیت آہانی تہءَ یکے سافٹ پاور اِنت ءُ دومی ہارڈ پاور اِنت۔ ہارڈ پاور ءِ تہ ءَ تشدد کارمرز کنگ بیت ءُ ایردستیں مہلوک لٹ ءُ کُٹ کنگ بیت، بزاں تشدد ءِ زور ءَ مہلوک دارگ بیت ءُ ایردست کنگ بیت۔ دومی سافٹ پاور ءِ تہ ءَ نرمی گوم ءَ مہلوک ءَ پیش آیگ ءِ رویشت آرگ بیت ءُ ترقی، آسراتی، کسان کسانیں پروجکٹس ءُ ایدگہ کارانی وسیلہ ءَ مہلوک رد دیگ بیت ءُ آئی ءِ بروسہ ءَ وتی نیمگ ءَ آرگ ءِ کوشست کنگ بیت۔ اے سرجمیں پندل کہ کارمرز بنت تہنا ہمے واستہ کہ ایردستیں راج ءِ مڈی چوں لُٹ ءُ پُل کنگ بہ بنت۔
دیمترءَ سنگت ءَ گوْشت کہ بندات ءَ یورپ ءِ ملک کاروبار ءُ پٹ ءُ پول ءِ نام سر ءَ دنیا ءَ گول اَنت ءُ چکر جن اَنت گُڈا اش بازیں زمینے گند اَنت چوشکہ امریکہ، ہندوستان، بلوچستان، افریکہ ءُ ایدگہ بازیں ملکے گِند اَنت گُڈا اے بندات ءَ ہما زمین ءِ سر ءَ مہلوک ءِ گورءَ کاروبار ءِ نام ءَ رونت۔ وہدے کاروبار ءِ نام ءَ رونت گڈا کم کم ءَ وتی مہلوک ءَ ہمود ءَ آبات کنگ ءَ بندات کن اَنت ءُ ہمے پیم کم کم ءَ جتائیں پندلاں گوں ہما زمین ءِ سر ءَ کبزہ کن اَنت۔ بلے نوزدہمی ءُ بیستمی کرن ءَ کالونیلزم گیش دیم ءَ کئیت کہ اد ءَ چہ بازیں ملکے ءِ سر ءَ پہ زور کبزہ کنگ بیت ءُ کالونی جوڈ کنگ بنت۔ ہمے دور ءَ کالونیلزم ءِ وہد ءَ بیستمی کرن ءَ نیشنلزم ءِ لیکہ ہم مہکمی ءُ تیزی ءَ گوں دیم ءَ کئیت ءُ کالونیلزم ءِ دیم ءَ اوشتیت۔ بیستمی کرن ءَ کہ ہمنچو زمین کبزہ کنگ بیت گُڈا بازینے آجو ہم کنگ بیت ءُ کالونائزر تاچینگ بنت ءُ کشگ بنت۔ دو مزنیں جہانی جنگ ءُ سارتیں جنگءِ تہ ءَ ایردستیں راج پاد کائینت ءُ پہ وتی راجی استان ءَ جہد کن اَنت گڈا بازیں ملکے آجو بیت۔ دومی جہانی جنگ ءَ پد نبشتہ کار ءُ لہتے زانتکار ھمے گپ ءَ دیم ءَ کار اَنت کہ کالونیلزم نی ھلاس بیتگ پرچاکہ اے جنگ ءِ تہا مزنیں تاکتوریں استاناں پروش وارتگ ءُ بازیں ایردستیں راج آجو بیتگ اَنت۔ بلے پدا راستی اے بیت کالونیلزم ہلاس نہ بیت بلکیں سارتیں جنگ ءِ وہد ءَ ہم برجاہ بیت ءُ دانکہ مرچی ہم برجاہ اِنت۔ دومی جہانی جنگ ءَ پد نوکیں دروشمے دیم ءَ کیت اِنت کہ نیو کالونیلزم ءِ نام ءَ زانگ بیت۔ نیو کالونیلزم ءِ تہا زوراور ءُ تاکت وریں استان دومی استاناں کبزہ کنگ ءَ وت نئیت ءُ ناکہ وتی لشکرءَ دیم دنت بلکیں دومی استان ءَ معاشی، سیاسی ءُ ایدگہ ہوالہ ءَ وتی سان(اثر) ءِ چیر ءَ بہ کنت، بہ زاں دومی ملک ءِ سرءَ وتی اثر ءَ انچو ایر بہ کنت کہ آ وتی فیصلہ سازی ءَ وتواک مہ بیت۔ اے گوں سافٹ پالیسی، انتظامی، ءُ معاشی ہوالہ ءَ دگہ استاناں ایر دست کن اَنت۔ گشگ بیت کہ نیو کالونیلزم چہ کالونیلزم ءَ ھم گیش ترسناک ءُ خطرناک انت۔
گُڈسر ءَ سنگت ءَ گوْشت کہ کالونیلزم ءِ مستریں تاوان اِش اِنت کہ اے انسان ءَ چہ انسان ءِ کَٹ ءَ بارت، انسان ءَ ڈی ہیومنائز کنت۔ انسان ءَ انسان بیگ ءِ ھکءَ پچ گِپت ءُ آئی ءَ جناوریں زِند ءِ گوازینگ ءَ لاچار کنت۔ سنگت ءَ پدا ڈی کالونائیزیشن ءِ سرءَ ٹوک کت کہ چوں یک راج یے وتءَ ڈی کالونائیز کت کنت ءُ پرچا اے عمل یک قوم یےءِ واستہ اژدری اِنت انچوکہ بلوچ راج مرچی ڈی کالونائزیشن ءِ عمل ءَ جنزینگ اِنت۔
دیوان ءِ گُڈسر ءَ جُست ءُ پُرسی بھر ءَ پد دیوان ءِ ھلاسی جار جنگ بوت۔
