BSAC Struggling For Knowledge And Unity 
بلوچ اسٹوڈنٹس ایکشن کمیٹی پَنجگُور ھنکین ءِ ھنکینی لس دیوان برجم دارگ بوتگ۔
نصرت بلوچ کارمستر ءُ اختر بلوچ کارگشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی پَنجگُور ھنکین ءِ ھنکینی لس دیوان ھنکینی ڈپٹی آرگنائز اختر بلوچ ءِ سروکی ءَ برجم دارگ بوتگ۔ دیوان ءِ ھاسیں مھمان بنجاہی کمیٹی ءِ باسک عامر بلوچ ءُ سلیم بلوچ بوتگ اَنت۔ دیوان ءَ جتائیں بنگپ کہ آہانی تہ ءَ بنجاھی سرکیولر، گوستگیں ھنکینی اھوال، شرگداری، گَل کاری، ھندی ءُ میان استمانی سیاسی جاورھال ءِ سرءَ گوں دلجمی ءَ باوست ءَ پد آؤکیں گامگیج ءِ سرھال ءَ پیسری آرگنائزنگ باڈی ھلاس کنگ بوتگ ءُ پہ نوکیں کابینہ ءَ سنگت گچین کنگ بوتگ اَنت۔
دیوان ءَ بنجاھی سنگتاں پنجگور ہنکین ءِ گوستگیں کارمستر نمیرانیں ظاہر بلوچ ءَ دروت ندر کنان ءَ گوْشت کہ گل ءَ نمیرانیں ظاہر ءِ وڈیں نہ تُرس، کمیٹڈ ءُ تمردیں ورہانی زلورت اِنت کہ آ گل ءِ کار ءُ پروگراماں وتی زمہ واری سرپد بہ بنت ءُ شپ روچ پہ گل ءِ دیمروئی ءِ ھاترا جہد بہ کن اَنت۔ اے ظاہر ءِ وڈیں ورناھانی برورد بوتگ کہ یک کسانیں وھدے ءَ جتائیں جیڑہ ءُ اڈانداں ابید گل ءِ پنجگور ھنکین جوانیں رنگے ءَ فعال کتگ۔ ارمان اِنت کہ ظاہرءِ ڈولیں ورنا جسدی دروشم ءَ مئے پجی ءَ نہ اَنت بلے آہانی پگر ءُ فلسفہ مدام بلوچ ورناھانی رہشونی ءَ کن اَنت۔
دیمترءَ سنگتاں گُوْشت کہ پَنجگُور ءَ نودربر سیاست ءُ وانگی ماھول ءِ دارگ ءِ واستہ جتائیں ٹولی سرکار ءِ سرپرستی ءَ کار کنگ ءَ اَنت ءُ مزنیں مدتے بیت کہ ادءَ دین ءِ نام ءَ ترس ءِ چاگردے جوڈ کنگ بیتگ بلے اے میان ءَ تنظیمی پروگرام ”صبا لٹریری فسٹیول پَنجگُور ءِ اڈ دیئگ، بلوچ لٹریسی کیمپئن ءِ سرءَ دلجمی ءَ کار، بلوچستان کتاب کاروان ءِ دروشم ءَ کتاب دود ءِ دیمءَ برگ ءُ گَل ءِ نیمگ ءَ چہ چاپ بوتگیں زھگانی تاک گام ءِ پروم ءِ وانگجاہانی تہ ءَ وانینگ مزنیں سوبمندی اَنت۔
سنگتاں دیمترءَ تران کنان ءَ گوْشتگ کہ بلوچستان ءِ سیاسی جاورھال روچ پہ روچ مٹ بوان اَنت، ما ھمے چاگردءِ تہ ءَ سیاست کنگ ءَ ایں ءُ اے گپ تچک اِنت کہ کش ءُ گوْرءِ جاورھالانی سان گَل ءِ سرءَالم کپ اَنت بلے مارا وتی باسکانی میان ءَ ادارہ جاتی سوچ مہکم کنگی اِنت داں ہر وڈیں جاورھالاں پَنجگُور ءِ ھند ءُ دمگاں گل ءِ کار ءُ پروگرام برجاہ دارگ بہ بنت۔ سیاسی گلے ءِ بستار ءَ مارا وتی پالیسی لانگ ٹرم بنیات ءَ گشینگی اَنت داں مستقل بنیات ءَ گل نودربرانی رھشونی ءَ بہ کنت ءَ بلوچ جُنز ءَ مہکمیں کیڈر دات بہ کنت۔
جتائیں بُنگپانی سرءَ گپ ءُ تران ءَ پد دیوان ءِ گُڈی بنگپ آؤکیں گامگیج ءَ گوستگیں آرگنائزنگ باڈی ھلاس کنگ بوت ءُ پہ نوکیں کابینہ ءَ سنگت گچین کنگ بوتگ اَنت۔ نوک گچین بوتگیں کابینہ ءَ نصرت بلوچ ھنکینی کارمستر، عائشہ بلوچ کمک کارمستر، اختر بلوچ کارگُشاد، زید بلوچ کُمک کارگشاد ءُ برمش بلوچ ھالرسانی کارگشاد گچین کنگ بوتگ اَنت۔ گڈی بھر سوگندی بھر اَت کہ بنجاھی سنگت ءَ نوک گچین بیتگیں کابینہ سوگند دات ءُ دیوان ءِ ھلاسی جار جنگ بوت۔
بنجاہی جارکش بلوچ اسٹوڈنٹس ایکشن کمیٹی
