BSAC Struggling For Knowledge And Unity بلوچ اسٹوڈنٹس ایکشن کمیٹی تونسہ ہنکین نیمگ ءَ شہ ہنکینی ھیلکاری دیوانے اڈ دارگ بثغ۔
بلوچ اسٹوڈنٹس ایکشن کمیٹی تونسہ ہنکین نیمگ ءَ شہ ہنکینی مزنیں ھیلکاری دیوانے ہنکینی کارمستر مظہر بلوچ ءِ سروکی ءَ برجم دارگ بیثغ۔ دیوان ءِ خاصیں مہمان بنجائی ہالرسانی کارگشاد اُزیر بلوچ بیثغ۔
سرہال: جیوپولیٹکس
تران کنوک: بنجائی ہالرسانی کارگشاد اُزیر بلوچ
دیوان ءِ بندات ءَ سنگت ءَ جیوپولٹیکس ءِ سر ءَ تران کنان ءَ گوْشت کہ جیوپولٹیکس زمین (جیوگرافی)ءِ ماں سیاسی تاگت سرءَ سان یا دزمانجنی، بزاں ہما سیاست یا سیاسی تاگت کہ آہی ءِ تہ ءَ زمین ءَ سان(اثر) ہوار اِنتءُ زمین ءِ وسیلہ ءَ یک تاگتے گوں دومی تاگت ءَ جنگ کنت یا نزیک بیت۔ زمین ءِ وسیلہ ءَ بازیں استان گوں یک ءُ دومی ءَ نزیک بنت، سیاسی سیادی دار اَنت ءُ بازینے مِڑ اَنت ءُ جنگ ہم کن اَنت۔ اے میان استمانی سیادی ( انٹرنیشنل ریلیشن) ءَ یک گالریچ( ٹرم) ئے ءُ بندات ءَ سویڈِش سیاسی زانتکار رڈلوف شلین ءَ دیم ءَ آورتگ، آئی ءِ نز ءَ یک استان ئے ءِ تہ ءَ جیڑہ ءُ ایدگہ چِست ءُ ایر جیوگرافی ءِ سوْب ءَ ودی بنت، آئی ءِ نامداریں گپے کہ نوکیں استان دیمروئی کن اَنت بلے آسر ءَ مِر اَنت بہ زاں ہلاس بنت۔ اے گالریچ بیستمی کرن ءَ گیشتر کارمرز بیت ءُ دیم ءَ کئیت، پدا گُڈا اولی ءُ دومی مزن جہانی مزن جنگانی تہ ءَ گیش ہبرانی تہ ءَ کئیت ءُ مرچی یک مزنیں سیاست ءِ تہ ءَ مزنیں گالریچ ءُ سرہالے۔ اشی ءِ تہ ءَ گوْشگ بیت کہ دنیا ءِ تہ ءَ کہ زمین ءِ سرءَ اینچو چیز جوڈ بیگ اِنت بہ زاں ٹکنالوجی ءِ آیگ، ریل گاڑی، مزن مزنیں کاروباری دگ، کمپنی، بالی گراب ءُ آپی گُرابانی جوڈ بیگ دنیا ءِ سیاست ءَ مٹ کنت ءُ نوکیں دروشمے دنت۔
سنگت ءَ دیمتر ءَ تران کنان ءَ گوْشت کہ دنیا ءِ تہ ءَ گیشتر کہ جنگ ءُ جدل بنت آیانی سوْب زمین ءُ زمین ءَ مہسوسیں ٹِک اَنت کہ یا وا اود ءَ معدنیات در کئیت دومی معدنیات ءِ ہواری ءَ آئی ءِ انچیں ٹِک ئے کہ آ پہ میان استمانی سیاست ءَ ارزشت دار ایت۔ ہرچ ملک لوٹ ایت کہ آئی ءَ انچیں زمینے گون بہ بیت کہ آ دنیا ءَ گوں ارزانی ءَ کاروبار کُت بہ کنت ءُ جنگ ءِ وہد ءَ ہمے زمین ءَ وتی سنگر ءِ ہاتر ءَ کارمرز بہ کنت۔ ہمے پیم مرچی دنیا ءِ تہ ءَ کہ جنگ ءُ جدل بیگ ءَ اَنت آ ہما مزنیں دریں تاگتانی سوْب ءَ کہ آہانی چم ہمے مخصوصیں ٹِک ءِ سر ءَ سک اَنت۔ دنیا ءَ سیاسی تاگتے بیگ ءَ ہاترءَ زر ءِ مزنیں کِردے ہست بہ زاں ہما ملک ءُ استان کہ آہاں زِر ہست آ تاگتوریں ملکانی تہ ءَ شمار بنت( لہتیں ملکاں ابید کہ آ وت دگہ ملکانی ایردست اَنت)، اے وا ہیر اِنت اشی ءَ چہ مستریں ہما ملک کہ آہاں زِر ءِ انچیں ٹِکے گون کہ آ میان استمانی سیاست ءُ کاروبار ءَ مزنیں کردے دار ایت آ ملک بہ زاں آبات اِنت۔ اشی ءِ باز درور اِنت بلے مستریں درور امریکہ اِنت کہ آئی ءَ مزن زرانی تہ ءَ مزن مزنیں ءُ ارزشت داریں ٹِک گون اَنت، دومی نیمگ ءَ روس اِنت کہ آئی ءَ زِر وا ہست بلے آ زِر کارامد نہ اَنت بلکیں سال ءَ ماہانی ماہ برپ اَنت پمیشکا زِر ءُ زِر ءِ مخصوصیں ٹِکانی بیگ میان استمانی سیاست ءِ تہ ءَ اہمیں بھرے۔ پمیشکا گوْش اَنت کہ ہما ملک ءَ کہ آپ ءِ سر ءَ حکمرانی (کنٹرول) بیت بہ زاں آئی ءَ دنیا ءِ سیاست ءِ سر ءَ حکمرانی کُت پدا اے دنیا ءِ واستہ یک تُرسناک بیت۔
سرہال ءِ سر ءَ دلجمی ءَ گپ ءُ تران ءَ پد گُڈسر ءَ جُست ءُ پُرسی بھر اَت کہ آئی ءِ سنگتاں وتی جُست ایر کُت اَنت، جُستانی پسو دیگ ءَ پد دیوان ہمود ءَ چہ آسر کنگ بوت۔
