BSAC Struggling For Knowledge And Unity 
کندیلیں استاد نمیران سباء دشتیاری
پنتاک
مڑاھداریں راج
دنیاءَ راجی بامردانی مزنیں شرپ ءُ بستارے ھست۔ ھمک راج وتی راجی رَھشوناں وتی آئیڈیل لیک اَنت کہ آیاں وتی چاگردءِ دیمروئیءَ پہ عملی رنگءَ جُہد کتگ۔ وتی زبان ءُ ربیدگانی رکینگءَ وتی زاتی زند کربان کتگ اَنت پمیشکہ مروچی آ یات کنگ بنت۔ اے پیمیں رھشونانی مزنیں لڑے کہ آیاں نہ تہنا پہ وتی راجءَ مسالی اَنت بلکیں دنیاءِ آشوب ءُ مٹینگءَ آیانی مزنیں کردے ھست اِنت۔ انچوکہ فرانسءِ شھزانت سارتر بہ بیت، کہ آئیءَ وتی راجءَ چہ ڈن دنیاءِ ایدگہ ایردستانی کمک کتگ، یا کہ میکسیکوءِ گارشیا مارکیز بہ بیت کہ آ کیوباءِ کمکءَ امریکہءِ ھلاپءَ اوشتیت۔ ھمے رنگءَ سیاستءِ پڑءَ مارا لینن ءُ ماؤءِ وڑیں مزنیں رھشون گندگءَ کاینت کہ آیاں ایردستیں مہلوک پہ زورگیرءِ ھلاپءَ پاد آھگءِ سکین داتگ اَنت۔ دومی دنیاءَ دگہ ھزاراں مردم پیداک بوتگ اَنت بلے آیانی نام یکروچے ھم گرگ نہ بنت پرچا کہ آیاں نہ پہ وتی راجءَ چوشیں کردے پیلو کرتگ نئیکہ دنیاءِ ایدگہ ھند ءُ جاہاں آیانی کردارے ھست اِنت۔ بُندپتر ھما نام ءُ کارستاں یات کنت کہ آیاں پہ بنی آدمءِ زندجاور مٹینتگ اَنت، راجانی وشھالیءِ مانزمان بوتگ اَنت۔ وش بھتیں مردم ھما اَنت کہ آیانی بروردءَ مروچی راج وشھال اَنت۔ پمیشکہ اے پیمیں کردار ھجبر نہ مر اَنت بلکیں دنیا ھمایاں مدام گیرکاریت ءُ ھمایانی فلسفہءَ ایردستیں راجانی آشوبی بنھشت ایر اَنت۔
باسمائیں بلوچ
بلوچ ھم انچیں راجے کہ آئیءِ گورءَ بازیں انچیں کارست گوستگ اَنت کہ بلوچ مہلوکءَ نہ تہنا آیانی شرپ ءُ ازت کتگ بلکیں گیشتریں مہلوکءَ آیانی یات وتی سینگءَ داشتگ اَنت، آیانی کِسہ وتی زھگ ءُ چک پہ دَرس ءُ ھیلداری، یادداشتانی بہر کنگءِ مدام سکین داتگ اَنت۔ پمیشکہ ما گندیں کہ بلوچءِ سرجمیں راجدپتر ھست گڑا ھمے مہلوکءَ سرزبانی(oral) دروشمءَ سینگ در سینگ یات کتگ اَنت ءُ دومی پدریچءَ سر کتگ اَنت۔ اے بلوچءِ دورچاری اِنت کہ وتی راجدپترءِ پہازگءَ شئیر، داستانءِ روایت برجاہ داشتگ دانکہ بلوچءِ راجی یادداشت ءُ بُندپتر گار ءُ گور مہ بنت۔ بلے وھدے کہ ایردستیءِ گرانیں روچ بلوچءِ سرءَ کاینت گڑا بلوچ پرنگیانی دیمداری ءُ آیانی ھلاپءَ بنداتی روچءَ جنگءِ جارءَ پرینیت ءُ آیاں وتی ڈیھ ءُ ڈگارءَ چہ کشیت بلے آیانی گُپتمان انچوش مہکم بیت کہ بلوچءِ بازیں چیزے دومی نوکیں جوڑ بوتگیں استانےءِ وانگی ادارہانی سببءَ گوں وتءَ بارت گوں پرچا کہ اے غیر فطرتی استان پرنگیانی داتگیں گپتمانءَ وتی وانگجاہاں پریکٹس کنت ءُ دومی ھمائیءِ ادارہاں چہ پیداک بوتگیں نیمبندگیں وانندگ بلوچءِ روایتانی پروشگءَ لانکءَ بند اَنت۔ پمیشکہ اے بلوچ وانندگ کہ زورگیرءِ وانگجاہاں چہ در کاینت گڑا اِشانی اندرءَ ابیدء احساسءِ کمتریءَ دگہ ھچ پشت نہ کپیت گڑا اے برے یک گپے دیمءَ آرگءَ بندات کن اَنت برے گش اَنت،”بلوچ ءُ شومیں روچ “،” بلوچ ءُ مُردگ پردست “۔ بلے چوشکہ اے نوکیں بلوچ ھمے زورگیرءِ پیداوار انت، اِشانی ھیلکاری انچوش بوتگ۔ بلے وھدے کہ بلوچءَ کندیل صبا دشتیاری وڑیں زانتکار ءُ رھشون دست کپیت گڑا آ بلوچءِ جیڑہءَ ھمک دیوان، ھمک وانگجاہ ءُ مراگشاں سر کنت۔ اے پیمیں جرت مندیں مردمءِ ودی بوگ بلوچءِ پہر ءُ شانءَ مزن کنت ءُ زورگیرءِ بیانیہءِ دیمداری ءُ وانگی تربیتءِ دیم سیاہ کنت۔
براھمدگاں!
کندیل صباء دشتیاری 1953ءَ ماں کراچیءِ دمگ ماڈی پورءَ واجہ محمد اژمانءِ گسءَ ودی بوت۔ آئیءِ بنداتی نام غلام حسین ات بلے وھدے کہ وتی بلوچیءِ مزنیں نامیں لچہکار بانل دشتیاری آئیءَ رودینیت گڑا آ وتی گامءَ بلوچی زبان ءُ لبزانکءِ نیمگءَ گور کنت گڑا بانل آئیءِ نامءَ صبا دشتیاری ایر کنت۔ آ وتی بنداتی وانگ ءُ زانگءَ کراچیءَ چہ سرجم کنت۔ ھمے میانءَ ماں لبزانکی ءُ راجمانی چست ءُ ایراں ھوار بیت۔ اے درگتءَ آ وتی اکیڈمک وانگ ءُ زانگءَ برجاہ دار ایت ءُ چہ شہزانتی (فلسفہ) ءُ اسلامیاتءَ ماسٹر کنت۔ وتی نبشتہ کاریءِ بنداتی زمانگءَ اردوءَ شائری اوں کنت بلے دیمترءَ وھدے کہ بلوچی لبزانکءَ گوں نزیک بیت ءُ بلوچستان مزن شہدربجاہ شالءَ پروفیسرےءِ بستارءَ وانینگءَ بندات کنت ءُ عبدالجان جمالدینیءِ دیوانءِ بہر بیت گڑا ادءَ چہ آئیءِ اندرءَ مزنیں مٹی ءُ بدلی کیت اِنت۔ چدو پد کندیلء بلوچ آ صبا نہ بیت کہ لکنھوءِ دودمانءَ چہ بندات سان ئِے زرتگ کہ آئیءِ پُچ ءُ پوشاکءَ بگر داں شئیرگوشی ءُ جیڑگءِ تب سرجمءَ گوں ھمایاں بستگ ات ءُ بلوچءِ بابتءَ آئیءِ بنداتءَ ھیال سرجمءَ احساسءِ کمتریءِ آماچ بوتگ بلے اے عبدالجان جمالدینیءِ سرکل آئیءَ بلوچ تب سازیءِ مستریں مانزمان بیت ءُ صبا یک بلوچ دوستیں ءُ زبانزدوستےءِ بستارءَ وتی شپ ءُ روچاں پہ بلوچ ءُ بلوچی زبانءَ ندر کنت۔ اگاں سید ظہور شاہ ہاشمیءَ پد پہ بلوچ لبزانکءِ دیمروئیءَ کسےءَ مزنیں گامے وتی کوپگاں زرتگ گڑا آ کندیل صبا دشتیاری ات، کہ یک وھدےءِ میانءَ آئیءَ وتی لبزانک ءُ راجمانءِ کلیں جیڑہانی ہورکیں جاہانی نشاندہی کت ءُ پہ آھانی پُر کنگءَ عملی بستارءَ میدانءَ اتک۔
وانندگیں بلوچ راج
کندیل صبا دشتیاری نہ تہنا فردے ات بلکیں آ وتی تہءَ ادارہے ات، یک نیمگےءَ سیدءِ میراس ءُ کارانی ڈبہ آئیءِ کوپگءَ ات، دومی نیمگءَ آ انچیں سرشونی کتابجاہےءِ ھاترءَ تگ ءُ تاچ کنگءَ ات کہ چوشیں سرشونی کتابجاہءِ کسءَ گمان ھم نہ کتگ کہ آئیءَ انچیں مزنیں کتابجاہے پچ کُت کہ ھر بلوچے کہ بلوچ ربیدگ، دودمان، سیاست، زبان ءُ لبزانکءِ بابتءَ پٹپولے کنگ بہ لوٹیت گڑا اے سرجمیں نکان سید ریفرنس کتابجاہءَ دست کپ اَنت، اے سرجمیں کار یک مردےءَ وتی کوپگاں زرتگ اتنت۔ اِشیءَ ابید آ ھمک روانک ءُ زھرشاناں بگر داں نودربر گل ءُ وانندگانی دیوانءِ بہر ات، برے اوگام جنگءَ گڑا برے پگری ھیلکاری نودربرانی کنگءَ ات، برے ریاستءَ بیھار دیگءَ ات، برے یک متبدلیں وانگی نظامے ماں زری وانگجاہءَ جوڑ کنگءَ ات۔ بلے اے عمل ریاستءَ دوست نہ بوت 1جون 2011ءَ آئیءَ ماں شالءِ دگءَ تیرباران کت۔
زمہ واریں بلوچ رَھدربراں
بلوچاں ھجبر وتی میراس، کماش ءُ آیانی پکر پشتءَ دور نہ داتگ بلکیں بلوچاں چوش ھم گشتگ کہ”کماشاں وتی چاردءِ لمبءَ بند “، یا”بلوچاں چوش ھم گُشتگ کہ وشیاں ھاتوانیں جنین نوش اَنت سکیاں برات گوں مرکباں اوشت اَنت “۔ بلے ما بچار ایں کہ اے نازرکیں وھدءَ ما وتی پت ءُ پیرکی راہءِ سرءَ روگءَ اِنت یا ناں؟ اگاں اناں اِشیءِ سبب چی اِنت؟ اے بابتءَ پٹپول ءُ نبشتہ کنگءِ زمہ واری کئی کوپگءَ اِنت، اے بابتءَ سرپدی ءُ مہلوکءَ سر ءُ سوج کنگءِ زمہ دار کئی اِنت؟ بلوچءِ باسماتریں مردم رَھدربر اَنت انچوشکہ صبا بوتگ کہ آیاں شپ ءُ روچ ھمک جاہ ءُ تبکءَ نودربراں بلوچءِ فلسفہ ءُ ایردستیءِ مارگ ءُ سما کنگءِ سنچ پیداک کرتگ، گڑا بائد نہ اِنت کہ اے گرانیں وھدءَ درستاں چہ مستریں زمہ واری رَھدربرانی کوپگءَ اِنت کہ آ صباءِ فلسفہءَ بہ زور اَنت ءُ بلوچءِ بے سمائی ءُ بے زانگیءِ جوپہءَ چہ بہ کش اَنت دانکہ ما سلکار ءُ بوہ داریں چاگردےءِ تاموسیءَ چہ آوکیں پدریچءَ رکینت کُت بہ کنیں۔
بلوچءِ باسماتریں مردم رَھدربر اَنت انچوشکہ صبا بوتگ کہ آیاں شپ ءُ روچ ھمک جاہ ءُ تبکءَ نودربراں بلوچءِ فلسفہ ءُ ایردستیءِ مارگ ءُ سما کنگءِ سنچ پیداک کرتگ، گڑا بائد نہ اِنت کہ اے گرانیں وھدءَ درستاں چہ مستریں زمہ واری رَھدربرانی کوپگءَ اِنت کہ آ صباءِ فلسفہءَ بہ زور اَنت ءُ بلوچءِ بے سمائی ءُ بے زانگیءِ جوپہءَ چہ بہ کش اَنت دانکہ ما سلکار ءُ بوہ داریں چاگردےءِ تاموسیءَ چہ آوکیں پدریچءَ رکینت کُت بہ کنیں۔
بلوچ اسٹوڈنٹس ایکشن کمیٹی
