بیست ءُ سئے اپریل میاں اُستمانی کتابانی روچ

بیست ءُ سئے اپریل میاں اُستمانی کتابانی روچ
وانندگیں بلوچ ورناھاں!
مرچیگیں روچ دنیاءَ کتابءِ ارزشت ءُ بستارءِ میاں اُستمانی روچ زانگ بیت۔ کتاب کہ دنیا ءُ بنی آدمءِ بُندپترءِ پَھازوک اِنت، سما ءُ سِنچءِ پیداک کنوک اِنت۔ مرچی کہ دُنیاءَ اینچو دیمروئی کتگ گڑا آئیءِ بنیاد سائنس ءُ فلسفہ اِنت کہ مردمءَ را چہ کتاب ءُ لبزانکءَ دست کپ اَنت۔ چوشکہ شعورءِ سرجمیں بُنزہ گوں علمءَ بندوک اِنت، باعلم ءُ باسمائیں چاگرد دنیاءِ گاماں سپر کنگءِ تاگتءَ دار اَنت، بے علم ءُ پدمنتگیں چاگردءَ ھمک سلکاری، رد چاگردیں تب ءُ میلانی روانیءَ گوں جنز انت، اُودءَ نہ سما ءُ سنچے پیداک بوت کنت ءُ نئیکہ چوشیں چاگردے کہ آشوب ءُ بدلیءِ زِکت بہ دار ایت، ھورکیں ذھناں چہ سازتگیں چاگردےءِ مال ءُ مت بزگی ءُ لگتمالیءَ ابید دگہ ھچ بوت نہ کنت۔ کتاب وانگ ءُ وانینگ پمیشکہ المی انت کہ چرائیءَ ھما زانت ءُ سرپدی ودی بیت کہ آئیءِ بنیادءَ مردم وتی جیڑہانی گیش ءُ گیواری ءُ آسودگیءَ پہ راہ ءُ در شوھازیت۔ پہ لگتمال ءُ پدمنتگیں راجاں علم ءُ آگہی ھمینکس المی انت انچو کہ جسمےءَ پہ ساہ، چیا کہ چوشیں راجانی باندات ھما وھدءَ رک ات کنت داں آ وتی پدمنتگی ءُ لگمتالیءِ روتگاں آژناگ بہ بنت ءُ پرایانی دیمءِ دارگءَ پوہ ءُ سرپد بہ بنت داں دُنیاءِ آسودگ ءُ زندگیں راجانی بروبریءَ اوشتات بہ کن اَنت۔ کتاب ناں تہنا اے سنچءَ دنت راجانی ھزاراں سالی دودمان ءُ بُندپتراں وتی تاکانی بہر بنت ءُ آیاں پہ دائمی ابدمان کنت۔
کتاب دوستیں نودربراں!
ھمک سال23 اپریلءَ دنیاءَ میاں اُستمانی کتابانی روچ دارگ بیت، اے روچ جہانی لبزانکءِ چیدگی بندپترے کہ اے روچءَ مزن نامیں نبشتکار ولیم شیکسپیئر، میگوئل ڈی، انکا گار سیلا سوڈیءَ چہ دنیاءَ سپر کتگ۔ اے روچ 1995 ءَ united nations Educational Scientitand Cultural Organization(UNESCOءِ جنرل کانفرنسءَ کتابانی روچ نامینگ بیت ءُ copyright ءِ فیصلہ زورگ بیت کہ ھر نبشتکارءَ وتی نبشتگینانی مُز بہ رس ایت، اے روچءِ نامینگءِ مکسد جہانی لبزانک، نبشتکار ءُ کتاب وانوکانی گیرآرگ بیت۔ دنیاءَ سداں ملکاں گیش اے روچ دارگ بیت کہ آ وتی لبزانک ءُ نبشتکارانی کاراں یات کن اَنت ءُ پہ آیانی ستا ءُ توسیپءَ جتائیں مراگاہ ءُ مراگش اڈ دینت۔ دنیاءَ اولی برءَ اے روچ 23 اپریل 1930 ءَ برجم دارگ بوتگ ءُ پدا 1995 ءَ اے روچ چہ یونیسکوءِ نیمگءَ جہانی روچءِ ھسابءَ دارگءِ فیصلہ بیت کہ اے درچ داں روچء مرچی برجاہ اِنت، اے روچءِ بُنکی مول ءُ مُراد کتاب ءُ آئیءِ ھک ءُ مُزانی ارزشتءِ سرپدی دیگ اِنت ءُ کتابءِ دودءَ گامے دیمءَ برگ اِنت۔ copyright ءِ کانودءِ گیشینگءِ مستریں مول ءُ مراد نبشتکاراں وتی ساچشتانی مُز ءُ مستری دیگ انت ءُ چرے ساچشتاں آیانی مالی راہ ءُ درانی گیشینگ انت۔ دنیاءِ ایدگہ راجانی وڑءَ بلوچ اوں ازگاریں لبزانکےءِ واھند انت کہ آئیءِ تہءَ بلوچءِ راجی بندپتر، دودمان شعر ءُ کسہ بند اَنت۔ چوشیں ھزاراں نبشتکار بلوچ زمینءَ وتی دلبندءَ پناہ داتگ کہ آیاں پہ اے سرڈگار ءُ آئیءِ مھلوکءَ دُنیا ءُ جہانءِ لبزانک نبشتہ کُتگ۔ گل خان نصیر، سید ظہور شاہ ھاشمی، عطا شاد، اکبر بارکزائی، کندیل صبا دشتیاری، مبارک قاضیءَ بگر داں مرچی ڈاکٹر فاروق بلوچ، منیر مومن، ساجد حسین ءُ ایدگہ ورنائیں نبشتکاراں بیا کُلاں بلوچءِ لبزانک پلگار اتگ ءُ نوکیں دروشم بکشاتگ کہ آیانی ستا ءُ توسیپ کنگ ءُ آ وانگ لوٹ اَنت۔
بودناکیں بلوچ ورناہاں!
آزمانءَ سر اَنت آ دگہ راج گوں وانگ ءُ زانگاں
پہ بلوچءَ مدام گُژن ءُ بیماری انت چی نبشتہ کناں
چہ جہانی آسودگی ءُ ایمنیءَ گستا، لگتمالی ءُ پدمنتگیءِ دنزاں گاریں بلوچ راجءَ را آئیءِ ورنا ءُ باسمائیں مردم چرے کَہرانی زندانءَ کش ات ءُ ایمنیں بانداتے دات کن اَنت، پمیشکا بلوچ ورناھاں لوٹیت کہ آ وتی ھستیں جاور ءُ آیانی توجیلءَ سرپد بہ بنت ءُ وتی شپ ءُ روچاں پہ وانگ ءُ دربرگءَ یک بہ کن اَنت۔ گلءَ وتی ورناھانی سیاسی ءُ باعلم کنگءِ زمہ واری کوپگاں بستگ، اے ردءَ کتابی ءُ علمی چاگردے ٹھینگءَ پہ جتائیں مراگش ءُ دیوان اڈ دیگءَ ھوار بلوچستان کتاب کاروانءِ نامءَ بلوچستانءِ ھمک کوچگ ءُ میتگاں شھر ءُ بازاراں کتابانی اسٹال جنگءَ انت، داں بلوچ ورنا کتاب ءُ علمءِ نیمگءَ بیا اَنت وتی راجی زمہ داریاں سرپد بہ بنت ءُ آیانی سرءَ بہ اوشت اَنت، گلءِ سِتک انت کہ راجےءِ ورنا آئیءِ دیمروئی دیوک اَنت، تنا وھدی راج دیمروئی نہ کن اَنت داں آ باسما ءُ سرپد مہ بنت۔ ھمے زانت ءُ سرپدیءِ سپرءَ گلءَ بلوچ ورنا وتی کاروانءِ مساپر کتگ اَنت کہ آیانی مِنزل راجی آسودگی ءُ ایمنی انت۔

بلوچ اسٹوڈنس ایکشن کمیٹی