BSAC Struggling For Knowledge And Unity 
بلوچستانءِ دگ راجی کُشندہیءِ چیدگ
پنتاک
گُلیں راجاں!
دنیا ءَ مہذبیں مُلک وتی مہلوک ءِ آسراتی ءُ وشھالیءَ جتا جتائیں کار کنگءَ مدام پیشگام ءُ واھگدار اَنت؛ مسالء ھبرءَ دربرجاہ ءُ پہ جانسلامتیءَ نادراہجاہ ءُ سیکورٹی دیگ بیت ءُ پہ ترگ ءُ روگ ءُ آھگ ءَ دگ جوڑبیت،لیب ءُ گوازیءَ پہ آسراتی دیگ بیت یا کہ ازم ءُ لبزانکءَ پہ کارگل جوڑ کنگ بیت دانکہ مہلوک ءِ زِند گوازینگ ءِ عمل آسودگ ءُ آسان بہ بیت۔ یک استانے ءِ بنکی مول ءُ مراد مہلوک ءَ آسراتی دیگ ءُ آئی ءِ زِند گوازینگ ءِ ہرچ بنکی آسراتیاں سرجم کنگ ءُ آئی ءِ زِند ءِ پاھازگ ءَ پہ وتی زمہ واریاں پیلو کنگ بیت۔ وھدے کہ یک استانے اے زمہ واری ءِ پیلو کنگ ءَ بے سوب بہ بیت گڑا آ استان ءُ ملک ءَ ہچ پائدگ ءُ مکسدے نہ بیت بلکیں آ بے سوبیں استانے گوࣿشگ بیت۔
شرپمندیں بلوچ راج!
دنیا ءَ دگ ویلاں چہ بازیں مردمے چہ وتی ساہاں زبہر بیت بلے آ ملک وتی ردیاں منّ اَنت ءُ ہمے ویلانی دارگءَ گامگیج زور انت، کار کن اَنت۔ بلے بدبھتیءَ بلوچستان پشتوخواہ، سندھ ءُ پنجابءِ نزءَ ہما دمگ اِنت کہ ادءَ دگ ویل روچ روزینی ھساب ءَ گِندگ بوگءَ اَنت کہ سالے ہزارانی کچ ءَ بلوچ ورنا، پیر ءُ کماش، زھگ ءُ زالبول ءُ کھولانی کھول چہ دگ ویلءَ مِرگءَ اَنت۔ بلے دومی نیمگءَ چار ایں گڑا پاکستان بلوچستانءَ سی پیک ءُ دیمروئیءِ بنجاہ ھیال کنت۔ بلوچستان کہ سرجمیں استان ءَ لاپ دیگ اِنت ءُ آئی ءِ مڈیانی سرءَ دومی راج زِند گوازینگ ءَ اَنت بلے دومی نیمگ ءَ بلوچ مہلوک دومی مزنیں آسراتیاں وَ انگت جہندم کن بلکیں شریں دگّے ءَ چہ ہم زبہر اِنت۔ سرجمیں بلوچستان کہ مستریں زمین اِنت یک موٹروے یے ہم نہ گواہیت ءُ ہستیں شہدگ(ہائی وے) کہ ھست اَنت کُل یکراہ (ون وے) اَنت، دو نیمگی ( ڈبل وے)دگ نیست۔ مکُران ءَ گوں کراچی ءَ ھوار کنت، گوادر داں شال، شال داں کراچی، نصیرآباد ءِ دمگ کہ سکیں رو آئیں دمگے، اے سرجمیں جاہاں یک مزن ءُ دو نیمگی دگے ہم نیست بلکیں اِش کُلیں دگ یکراہ اَنت بزاں روگ ءُ آھگ ءِ راہ ہمے یکین اَنت پدا دومی ہمے یکراہیں کہ دگ ھست اَنت ہم پرشت ءُ پروش ءِ آماچ اَنت۔ یاکہ آیانی انجینئرینگءِ کار ایف ڈبلیو او بوتگ کہ آ وت پوجءِ ادارہ یے، انوں ایشانی گورءَ کجا انجینئرینگءِ کاگد ھست اِنت، بے انجینئرینگ ءُ سرکارءِ دلگوش نہ دیگءَ ہمے جیڑہ ودی بوگءَ اَنت، کہ اے دیمروئی نام تہنائیں بٹاکےءِ ھمبرائیءَ بلوچانی ساہگیریءِ پندلے کہ ہزاراں مردم ماہانی اندرءَ دگ ویلءِ زدءَ کاینت۔
گُلیں لس مہلوک!
یک نیمگے بلوچستان ءِ نام ءَ دیمروئی ڈولیں اوگام گِندگ بیت، اکس ءُ تامرانی تہ ءَ بلوچستان ءِ دیمروئی کنوکیں اکس پیش دارگ بیت بلے ہمے وتگڑیں دیمروئی پہ بلوچ ءَ یک دیھ ءُ اژدھایےءَ مان کپتگ۔ دیمروئیءِ نامءِ سر ءَ بلوچ مہلوک ءَ لُٹ ءُ پُل یک دیمے ءُ آئی ءِ چیروکائی چُکچینی یک دیمے اے کُل بلوچ ءِ سر ءَ چکاسگ ءُ تجربہ کنگ بوگ ءَ اَنت۔ اے دگ ویل چم ءِ زاہر ءَ بہ گِندئے ویل اَنت بلے اے کُل چیروکائی بلوچ چُکچینی ءِ بھر اَنت چیاکہ اینچو دگ ویلاں ابید ہم اے دگ شر کنگ نہ بنت ءُ نئیکہ ایشی ءِ سر ءَ گپے بیت بلکیں ہمے پرشتگیں دگانی نام ءَ بلوچ رد دیگ ہم بوگ ءَ اِنت پہ درور دگ جوڑ کنگ ءِ نام سر ءَ اووٹ ءِ پِنڈگ، ہمے دگ کہ اووٹ پِنڈگ ءَ پد جوڈ ہم کنگ بہ بیت پدا ہمے پرشتگیں دگے ءِ سر ءَ ہمے اوٹ دیوکے ویل آماچ بیت ءُ بیران بیت۔ اے کُل گوں سمائی ءَ کنگ بوگءَ اَنت۔
مڑاھداریں بلوچ ورناھاں!
انوگیں وِندر دگ ویل مئے چمانی دیم ءَ اِنت کہ یک سہتے ءِ تہ ءَ ما نازاکیں ورناھاں چہ زبہر بئیں، ہمے جوڑ کرتگیں کُشندہیں دگ یکبرے پدا بلوچ ورناھاں چہ بلوچ راج ءَ پُل ایت ءُ شش بلوچ پُسگ چہ ساھاں زبہر بنت ءُ نمیران بنت کہ آہانی تہ ءَ گل ءِ زمہ وار ءُ باکردیں سنگت زاھر بلوچ، گل ءِ باسک شہاب بلوچ، شعیب بلوچ ءُ ہمراہ احمد بلوچ، سہیل بلوچ ءُ شیہک بلوچ ہوار اَنت۔ زاھر جان ءِ ڈولیں سیاسی کیڈرانی چو نمیرانی یک ویل ءُ اناگتے نہ اِنت بلکیں ہما چیروکائیں چکچینی ءِ درْچ اِنت کہ سالانی سال بوانءَ روان اِنت۔ زاھر ءُ ہمراہانی ہواری ءَ دگہ ہم بازیں بلوچ ورنا ءُ مہلوکے ہمے دگ ویلانی آماچ بوتگ ءُ بیران بوتگ اَنت۔ اےدگ ہمنچو تَنک ءُ کسان اَنت کہ بلوچ ءَ پہ تُرسءُ کُشندہ ءِ چیدگ جوڑ بوتگ اَنت۔
گلیں بلوچ
بلوچ راج دیری ئیں کُشت ءُ کوش ءِ آماچ اِنت کہ بازیں مردمے گوں نام ءَ ءُ بازینے بے نام ءَ جنگ ءُ کُشگ بیتگ ءُ بیگ اِنت ہمے پیم دومی نیمگ ءَ سیلاپ ءُ ہور ءُ مستریں دگ ویلانی سوْب ءَ بلوچ ءَ بازیں جانی تاوان بیگ اِنت۔ اِش ویل ءُ جیڑہاں پد ہم زمہ دارنی گوشاں مورے ہم نہ وارت۔ اے حکمراناں چم بند کتگ اَنت ءُ بلوچ ءِ مرگ ءِ ندارگ ءَ چارگ ءَ اَنت۔ بلوچ راج ءِ پُسگ آپءَ نیاورتگ اَنت ءُ ناکہ آزمان ءَ چہ کپتگیں اَنت کہ آہانی ہون چو ارزان کنگ بہ بنت، مئے مہلوک زندگ ءُ ساہ کشوکیں انسان اَنت ءُ مستریں اِش زمین ءِ واھُند اَنت پمیشکا مارا اِشی ءِ ہلاپ ءَ جہد کنگی اِنت ءُ وتی مردم پہ دگ ویلے ءِ ہرجان ءَ چہ رکینگی اَنت۔
بلوچ اسٹوڈنٹس ایکشن کمیٹی
