سید ظہور شاہ ہاشمی ءِ زند ءُ ازم ءِ گْونڈیں پجّارے

:سید ظہور شاہ ہاشمی ءِ زند ءُ ازم ءِ گْونڈیں پجّارے

زبان مناں وتءَ ہست، زمین مناں وت ءَ ہست، پرچا دِگرئے چمدار بہ باں۔

سید

واجہ سید ظہور شاہ ھاشُمی 21 اپریل 1926 ءَ واجہ سید مھمد شاہ ءِ گِس ءَ ماں گوادر ءَ ودی بوتگ۔ واجہ ءِ نام ظہور اھمد اِنت ءُ ھاشُمی آئی ءِ پنام اِنت۔ واجہ وتی بنداتی وانگ ماں گوادر ءَ سرجم کنتءُ ھمے میان فارسی ءُ اربی زبان ھم در بارت۔ واجہ ءَ پہ بلوچی ءُ بلوچستان ءَ گوھرے بوتگ کہ آئی ءَ وتی سرجمیں زند پہ بلوچی ادب ءُ بلوچستان ءِ ھاتر ءَ ندر کتگ، واجہ ءِ زانت ءُ پگر چو گوادر ءِ زِر ءَ جہلانک بوتگ کہ آہی ءِ سرجمیں زِند پہ بلوچی ءِ رکینگ ءَ گوستگ۔ واجہ ءَ وتی شائری ءِ تہہ ءَ بلوچستان ءِ باندات ءِ ھم شون داتگ، انچوشکہ واجہ گْوشیت

شال پیسر سگار ءِ ارجان اَت

دیناں بے سیت ایں گنجیں گوادر شُت

واجہ سید ظہورشاہ ھاشُمی ءِ بنداتی کار “انجمن ءِ اصلاح بلوچاں” گل ءِ جوڈ کنگ اَت کہ آئی ءِ مول ءُ مراد بلوچی زبان ءِ دیمروئی ءُ ایدگہ چاگردی جیڑھانی گیشواری بوتگ۔ ھمے کارانی پُشدر ءَ واجہ ءِ ھلاپ ءَ بازیں پندل سازی بیت ءُ مشکت ءِ ولی آئی ءَ گہگیری ءِ الزام ءَ بندیگ ھم کنت۔ چہ مشکت ءَ آجو بوگ ءَ پد واجہ کراچی ءَ روت ءُ ریڈو پاکستان ءَ بلوچی پروگرام کنت ءُ ریڈو پاکستان ءِ کارمستر اوں جوڈ بیت۔ ھمے پیم ءَ ۱۹۵۲ ءَ یکبرے پدا بلوچی زبان ءِ ھاتر ءَ سرچمّگ ءِ نام ءَ گل یے جوڈ کن اَنت، کہ آئی ءِ تہ ءَ بلوچی زبان ءِ بازیں کتابے چاپ ءُ شنگ بیت کہ آھانی تہہ ءَ بلوچی بُنکی کتاب ھوار بنت۔ چد ءُ پد واجہ ءِ جہد یکشل ءَ برجاہ بیت ءُ دیمترءَ واجہ کوچگاں روت ءُ بلوچی چاچ ءُ بتل، زبان ءُ ربیدگانی سرءَ پٹّ ءُ پول بندات کنت۔ ھمے وھد ءَ واجہ ٹی بی ءِ نادراہی ءِ آماچ بیت ءُ اے نادراہی واجہ ءِ کارانی نیام ءَ اڈاندے بیت۔ بلے واجہ ھرچ وڈیں جاوراں چو کوہ ءَ مھکم بیت ءُ وتی کاراں برجاہ داریت۔ پمے جاوراں واجہ نبشتہ کنت:

چہ من ءَ دلپروش ئے اگاں، دلپروش نباں

چو اگاں دل منی پْرشتیں سد برا پْرشتگ اَت

دیمترا واجہ وتی علاج ءِ ھاتر ءَ بہرین ءَ روت بلے نادراھی ءِ سوب ءَ کاراں یل نہ کنت، ھمودءَ وتی کتاب بلوچی سیاھگ ءِ راست نبیسگ ءِ سرا کار کنت ءُ گیشتریں پٹّ ءُ پول ءِ ھاترا ماں بمبئی ھندوستان ءَ ہم روت۔ اودءَ واجہ بازیں کتابے ھم چاپ ءُ شنگ کنت۔ چہ ایشیءَ پد واجہ کراچی ءَ روت ھمودءَ وتی بازیں کتاب نبشتہ کنت کہ آھانی تہ ءَ بلوچی اولی گِدار نازُک، بلوچی ءِ اولی ڈکشنری سید گنج ءُ بلوچی ادب ءُ راجدپتر ھوار اَنت۔

سید ءَ وتی ماتی زبان ءَ گاں ہمنچو مہر اَت کہ آہی ءَ پہ بلوچی زبان ءَ بلوچ ءِ میتگ میتگ ءُ کوچگ کوچگ گولیت ءُ لبزانی امبار شوہاز کُت۔ مردماں سید ءَ وڈ وڈیں گپ بست ءُ گوْشت کہ آ گنوک اِنت پمیشکا سید گوشیت

لہتے مناں گُش ایت گنوک

لہتے گُش ایت شیپتال، منی میار ایش اِنت کہ من وتی زُبان ءَ گپ جناں۔

بلے اے درستیں شگان ءُ گپانی اِشکنگ ءَ پد ہم سید پُشت نہ دنت بلکیں چوش پسو دنت؛

نہ بیتگ مادنیں راہ ءَ کسے گار

نہ ترّاں ہرکس ءَ پہکا جواب اِنت

سید ءِ لہتے نبشتگیں کتاب سید گنج، بلوچی زبان ءُ ادبی تحریک، بلوچی سیاہگ ءِ راست نبیسگ، بلوچی بُنگیجی، نازُک، تراپ کنیں ترمپ، انگر ءُ تُروگل، شکلیں شہجو، بِرْتکگیں بیر، سِستگیں دستوک، سِچکانیں سسا، بلوچی اردو بول چال، سید نمدی، شاہ لچہ کار، میر گند ءُ گِسد گوْار۔

واجہ سید ظہورشاہ ھاشُمی ءَ وتی دراھیں زند ءَ پہ بلوچی ءُ بلوچستان ءَ ندر کتگ، 4 مارچ ہما شُمُّیں روچ اَت کہ واجہ اے کوڈھیں امروز ءَ یل کُت ءُ نمیران بیت، واجہ مانش ماں مہوشہ کبرستان کراچی ءَ اِنت۔ سید یک سرجمیں راجدوستے اَت ءُ واجہ مرچی جسدی رنگ ءَ مارا یل کتگ بلے واجہ ءِ جہد ءُ پگر انگت ھرچ بلوچ ءِ دل ءَ زندگ اِنت۔

بلوچ اسٹوڈنٹس ایکشن کمیٹی