راجانی ماتی زبان راجی ھستمان ءِ مانزمان اَنت۔

پنتاک (بلوچی)
راجانی ماتی زبان راجی ھستمان ءِ مانزمان اَنت۔

باسمائیں بلوچاں
زبان یک راجےءِ یادداشت اِنت، تو ھما چاگرد ءُ ھما راج ءِ اندر ءَ ودی بئے تئی کلیں جیڑگ ءِ سِننچ ءُ سما یا کہ تئی دانشمندی، مارگ، ربیدگی زانشت ءِ جہگیری کنوکیں وسیلہ زبان اِنت بزانکہ زبان چاگردےءَ ردوم زرتگیں مردمے ءِ پدکرد ءِ درْنگازوک اِنت۔ نوں کہ زبان یادداشت اِنت اگاں یک راجے وتی زبانءِ دارگءِ جُہدءَ مہ کنت گڑا زبانءِ مَرگ ءُ بیرانیءِ ھواریءَ آئیءِ کلیں رسم ءُ رواج، دود ءُ ربیدگ، دودمان ءُ پجار پشت نہ کپ اَنت۔مشل فوکوءِ نزءَ راجےءِ جَسدی ربیدگ(مٹریل کچرل) اگاں مٹ ءُ بدل بہ بنت گڑا انگت راجےءِ سرءَ چوشیں بلائیں تاوانےءِ کپگءِ گنجائش کم اَنت اگاں راجےءِ بے جَسدی ربیدگ(نن مٹریل کچرل)ءِ سرءَ مزنیں سان ءُ مٹی بئیت اِنت گڑا آ راج پشت نہ کپ ایت ءُ اے بے جَسدی ربیدگءِ مستریں وسیلہ زبان اِنت۔ بزانکہ اگاں راجےءَ وتی زبان داشت کُت نہ کُت گڑا آئیءِ ھستمان دگہ یک ناسرجمیں انسانی بُتےءِ کالبءَ مٹ ءُ بدل بیت۔ مروچیگیں دنیا وتی زورآوریں تاکتےءِ بوگءِ یک بُن بھرے(عنصر) زبان ءِ بنھشتءَ ایر کرتگ انچوشکہ ما انگریزی زبانءِ درورءَ زرت کُت کنیں کہ دنیاءَ را انگریز مہلوکاں ھمے درشان پدر کُت کرتگ کہ انگریزی زبان کاروبارءِ زبان اِنت کہ ھمک راجےءِ مردمءَ دربرگی اِنت بزانکہ اے انگریزی زبان جہانگیری(گلوبلائزیشن)ءِ نزیک کنگ، وتی گپ ءُ ھالانی سرکنگءِ ارزان تریں زبانے بلے اے گُپتمانے، راستی یے نہ اِنت۔ مروچی انگریزانی ربیدگ، آئیءِ زانشت ءُ دودمان ایدگہ راجاں ایر برگءَ اَنت، پمیشکہ مروچی میانی ایشیاءَ یک مزنیں بیھارے ءُ جنجالے۔ انگریز میانی ایشیاءَ دومی جہانی جنگءِ پد شت اَنت بلے آیانی میراس(legacy)ءِ پش کپگءِ یک وسیلہ یے زبان اِنت۔ ایشیءِ درورءَ ما اپریکہءِ کالونیلائزیشنءِ زمانگءَ گند ایں کہ مروچی اودءَ اپریکی بازیں زبانے پشت نہ کپتگ ءُ اپریکہءِ وتواجھیءَ پد اوں اپریکہ انگت ایردست ءُ گلامیں زندے گوازینگءَ اِنت۔
زَانندگیں ورناھاں
مرچی کہ ماتی زبانانی میاں استمانی روچ اِنت، اے ھما روچ اِنت کہ بنگالی راج ءَ پہ زبان ءِ پاھازگ ءَ وتی ھون ریتکگ اَنت، زبان آیانی راجی ھستمانءِ رکگءِ سبب بیت۔ دنیا ءَ بازیں زہرشانی ءُ جُنز بوتگ اَنت کہ اود ءَ کُشت ءُ کوش بوتگ بلے زُبان ءِ سرءَ اولی راج بنگالی اِنت کہ آھاں وتی ھستمان ءُ راجی بنھشت ءُ استانےءِ ایر کنگءَ زبان یک لیکہ یے جوڑ کُت ءُ ھمائیءِ وسیلہءَ وتی کلیں مردم یکجاہ کُت اَنت، راجی شعور ءُ سما ءَ گوں وتی آجوءُ وتواجھیں استانےءِ جوڑشتءَ سوبین بوت اَنت۔ آ وھد ءِ دنیا ءَ پہ اے ھبر بگندئے بہمانگی ھبرے اَت کہ یک راجے ءِ ورنا پہ زُبان ءَ پاداتک ءُ وتءَ ندر اش کُت۔ اے ہمے ورناھانی سوب اِنت کہ مرچی سرجمیں دنیا اے روچ ءَ دار ایت ءُ ماتی زبانانی پاھازگ ءَ سرجمیں دنیا ءَ سما ءَ یک سنچ ءُ سمایے ودی بوتگ۔ بنگالی راج ءِ سبب اِنت کہ ہما استان ءَ کہ بنگالی زُبان ءِ سرءَ ورنا جت ءُ کُشت اَنت بلے مرچی آ ھم اجالتی اے روچءِ دارگءَ لاچار اَنت۔ مروچی بنگالی وتی کُشندہ ءُ زورگیرءَ چہ ہزار گام دیمءَ اِنت، نہ تہنا آ روزیگی ھسابءَ باز دیمروئی کنان اِنت بلکیں آیانی انچیں مزنیں لبزانکے کہ ربندرناتھ ٹیگورءِ پیمیں شائرے ودی بوتگ ءُ آئیءَ نوبل داد گپتگ، بلے اردوءِ یک مردمےءِ نوبل داد وَ دوریں گپے دنیاءِ بُک سیلرءِ رمءَ گون نہ اَنت گوں۔ بُک سیلرءِ رمءَ چون گون بوت کن اَنت کہ آ وت ھاکم ءُ زورگیر اَنت۔ بَہ کولء نطشے ساچشت مزنیں درد ءُ دور یا کہ وتی زندءَ چہ سرگوزگءِ نام اِنت۔ ھمے بابتءَ قاضیءَ ھم وتی شئیرےءِ اندرءَ گشتگ کہ
زمانگءَ کن ئے ایرجیگ یا وتاچہ گوزئے
خمارجاہءِ دو دروازگ اَنت کجا چہ گوزئے
زمین ھموداں سوچیت کہ زور ئِے پر۔ بزانکہ آشوب بہ بیت یا کہ ساچشتءِ جیڑہ ایش ھما وھدءَ شاہکار بنت وھدے کہ اودءِ جاہمنند مزنیں تاڑ ءُ تیلانکانی آماچ بنت۔ پمیشکہ ما گند ایں کہ بنگالی مروچی ھمے تاڑ ءُ تیلانکاں پد دنیاءِ دیمروئی کرتگیں ملکانی تگ ءُ تاچءَ گون اِنت گوں۔
بلوچ راج
بلوچ ءِ ماتی زُبان مرچی جتائیں زبانانی نیمگ ءَ لگتمالی ءِ آماچ اَنت، دریں زُبان مئے زباناں ورگءَ اَنت۔ اے ایردستیں زبانانی زورآوری سکیں مزنیں بیھارے پرچا کہ اے نہ تہنا بلوچءِ زباناں مرگ آماچ کنگءَ اَنت بلکیں بلوچءِ جندءِ ھستمان ھم ترسءِ آماچ اِنت گوں۔ مئے ماتی زُباناں راج ءِ یاتگیریءُ مارشت ھوار اَنت کہ مارا بلوچ بوگ ءِ سکین ءَ دینت۔ مروچی ما پرچا لیاریءِ بلوچاں ایرجنیں کہ آیاں بلوچی زبان گاجیل کرتگ، پرچا کہ آیانی تچکءَ تچک زورگیرءِ زبان زرتگ، نہادیگءِ زبان اوں اردو اِنت، پمیشکہ لیاریءِ بلوچاں اردوءِ سانءَ بازیں چیزے گار کرتگ، اودءَ ھوار دگہ بازیں ھنداں بلوچ ربیدگ، رسم ءُ رواج مروچی پشت نہ کپتگ اَنت، مہمانداریءِ رواجءِ جند نیست، اجتماعیتءِ مارشتءِ جند پشت نہ کپتگ بزانکہ بلوچءِ کسان کسانیں رسماں بگر دانکہ مزنیں ربیدگ ءُ دودمانءَ بیا مروچی ھچ پشت نہ کپتگ ءُ ایشیءِ مستریں سبب اردو زبان اِنت۔ اگاں ما اے تیزگامیں دورءَ اردوءِ پیمیں کسانیں زبانےءِ ایردستیءَ وتءَ در کُت مہ کنیں گڑا ڈیجیٹل دنیاءَ گوں وتی ماتی زباناں ھمگام کنگءَ کرن درکار بنت۔ نوں اے کار ھمک بلوچ راجدوستیں گلاں وتی کساسءَ کوپگاں زورگی اِنت، بلے پریشیءَ بلوچءِ ھمک ورنا ءُ پُسگ نگیگیں جاوراں بلوچءِ ھمک ارزشداریں پڑاں مئےھمکوپگیءَ بہ اوشت اَنت۔ پرچا کہ راجانی زبان راجی ھستمانءِ مانزمان اَنت۔
بلوچ ءُ بلوچءِ ماتی زبان سبزبات اَنت۔

بلوچ اسٹوڈنٹس ایکشن کمیٹی