راجی لمئی بولیک راجی وجود نا ضامن ءُ

پمفلٹ (براہوئی)

راجی لمئی بولیک راجی وجود نا ضامن ءُ

چاہندار آ بلوچ آک

بولی اسہ راج ئسے نا یاداشت ءِ ، کس ہرا چاگڑد و راج ئنا تہٹی ودی مریک، اونا تیوہ سوچ خلنگ نا لائخیک و شعور یا اونا دانشمندی ، مارشت، دود و علم نا نمائندگی کروکا وسیلہ بیرہ بولی مریک ہندن سرپد مر کہ بولی چاگڑد ئٹی ردوکا بندغ کن عمل نا درشانی ءِ ۔ و اگہ بولی اسہ راج ئسے نا یاداشت ءِ ، اگہ اسہ راج اس تینا بولی ءِ رکھنگ نا کوشست کپ گڑا بولی نا کہینگ و ایسر مننگ تون اوار اونا دود و ربیدگ و پجار ہم رہینگپک۔ مشل فوکو نا ردئٹ راج ئنا مٹیریل کلچر اگہ مٹ مرے گڑا راج ئٹی بھلا نسخان آتا گنجائش کم مریک۔ اگہ راج نا نان مٹیریل کلچر آ بھلو زیم و مَٹی اس برے گڑا او راج پدان رہینگپک و دا نان مٹیریل کلچر نا کلّان بھلا وسیلہ بولی ءِ ۔ اگہ اسہ راج اس تینا بولی نا رکھ ءِ کتو گڑا اونا وجود اسہ وے پوروْ ءُ بندغ ئسے نا بُت نا دروشم ٹی مٹ مریک۔ اینو نا جہان نا تینا غٹ آن بھلا طاغت مننگ نا عنصر بولی نا بنداو تخانے ہندنکہ نن انگریزی بولی نا مثیل ءِ ہلنگ کینہ کہ جہان ءِ انگریز آک دا پاریر کہ انگریزی بولی کاروبار نا بولی ءِ ہرادے ہر راج ءِ ہیل کروئی ءِ ۔ انگریزی بولی گلوبلائزیشن ءِ خڑک کننگ و تینا خیال آتے سر کننگ کن اڑزان آ وسیلہ ءِ ولے دا اسہ بیانیہ ئسے، گواچن دا اف۔ اینو انگریز آتا روایت، اونا علم و سولائزیشن ایلو راج آتے شیف خلنگے ، ہندا خاطران اینو مڈل ایسٹ ئٹی اسہ بھلو جنگ و جدل ئس ساڑی ءِ ۔ انگریز آک مڈل ایسٹ آن ارٹمی جنگ عظیم آن پد ہنار ولے اوفتا میراث نا رہینگ نا سوب بولی ءِ ۔ دانا مثیل ءِ نن افریقی کالونائزیشن نا وخت ئٹی ہُننگ کینہ کہ اینو اوڑے بھاز آ افریقی بولیک رہینگ کتوس و افریقہ نا آجوئی آن پد افریقہ داسا ہم غلامی ءُ زند اس گدریفنگ ءِ ۔

زندہ غا ورناک

اینو ہندنکہ بولی تا جہانی آ دے ءِ ، دا ہمو دے ءِ کہ بنگالی راج تینا راجی بولی ءِ رکھنگ کن تینا دتر ءِ وہیفے، بولی اوفتا راجی وجود ءِ رکھنگ نا سوب جوڑ مس۔ جہان ئٹ کیہی برانز و تحریک آک رہینگانو ہراڑے خلنگ کھسفنگ آک مسنو ولے بولی آ اولیکو راج بنگالی ءِ ۔ ہرافک تینا راجی وجود و راجی بنداو و ریاست نا بحالی کن بولی ءِ اسہ نظریہ سینا دروشم ئٹ تینا کریر و اونا وسیلہ ئٹ ہی تیوہ بندغاک یکجاہ مسر، راجی شعور تون اوار تینا آجوئی و تینکن خودمختار ءُ ریاست اس جوڑ کننگ ٹی سرسہب مسر۔ او وخت نا جہان ئٹ مننگ کیک دا ہیت ہبکئی ءُ ہیت اس ئس کہ اسہ راج ئسے نا ورناک بولی کن یکجاہ مسر و تینا ساہ تا قربانی ءِ تسر۔ دا ہندا ورنا تا سوب آنے کہ اینو تیوہ جہان دا دے ءِ “بولی نا دے” نا ردئٹ گدریفک و لمئی بولی تا رکھنگ کن تیوہ جہان ئٹ اسہ شعور و آگاہی اس ودی مسنے۔ بنگالی راج نا بدولت ہمو ریاست ہراد بولی نا سوب آن ورنا تے کھسفے اینو ہمو ریاست ہم دا دے ءِ شکی مرسا گدریفک۔ اینو بنگالیک تینا قاتل و جابر دژمن آن ہزار اس زیات موناٹو، بیرہ زرگزرانی ردئٹ مونا ہننگ افس بلکن اونا ادب/لٹریچر ہم موناٹے و ربندرناتھ ٹیگور نا وڑ ءُ شاعر ودی کرینے و اود نوبل انعام ہم ہلکنے، ولے اردو نا اسہ ہم بندغ اس نوبل انعام تینا جاگہ غا بک سیلر نا لسٹ ئٹی ہم اوار تمتنے۔ بک سیلر ٹی امر اوار مرے جبکہ اوفک تینٹ حاکم و جابر ءُ ۔ نطشے نا ردئٹ تخلیق بھلو دڑد و تکلیف و تینا زند آن زیات سگینگ نا پن ءِ ۔ ہندا باروٹ قاضی ہم تینا اسہ شعر ئسیٹی پاریسس کہ،

زمانگ ءَ کن ئے ایرجیگ یا وتا چہ گوزے
خمار جاہ ءِ دو دروازگ انت کجا چہ گوزے

ڈغار ہموکان ہشنگک ہراڑے اودا زور مرے۔ ہندن پار آشوب مرے یا تخلیق نا جیڑہ ، دا ہمو وخت مونا بریرہ ہراتم اوڑے نا بندغ آک بھلو ڈکھ و ویل آتیان یند مریر۔ ہندا خاطران نن خنینہ کہ بنگالیک ہندا ڈکھ و ویل آتیان پد اینو جہان نا دیمروی کروکا ڈیہہ تیٹی اوار ءُ ۔

بلوچ راج

بلوچ نا لمئی بولی اینو جتا جتائنگا بولی تا سوب آن suppressed ءِ ، ڈّن ئنا بولیک ننا بولی ءِ کُننگ ءُ ۔ شیف خلنگوک بولی تیا جبر بھلو نسخان ئسے انتئیکہ دا بیرہ بلوچ نا بولی تے کھسفنگ اف بلکن بلوچ نا وجود آن ہم خُلیس ٹی ءِ ۔ ننا بولی تیٹی راج نا یاداشت و احساس آک اوار ءُ ہرا ننے بلوچ مننگ نا تربیت ایترہ۔ اینو نن لیاری نا بلوچ آتے انتئے ملامت کینہ کہ اوفک بلوچی بولی نا مون ءِ مون کرینو، انتئیکہ اوفک سیدھا قوضہ گیر نا بولی ءِ ارفینو ،مارکیٹی بولی ہم اردو ءِ ، ہندا خاطران لیاری نا بلوچ آک اردو نا زیم آتا سوب آن بھاز آ گڑا تے گوہانو، اردو تون اوار پین کیہی علاقہ آتیٹ دود و ربیدگ و روایت آک اینو ایسر مسنو، مہمان نوازی نا دود ہم اف، اجتماعیت نا مارشت ہم اف ہندن پار کہ چنکا چنکا ویل آن ہلیس بھلا دود و ربیدگ آتے اسکان ہچس رہینگتنے و دانا کلّان بھلا سوب اردو بولی ءِ ۔ اگہ دا ترند رفتار وخت ئٹ نن اردو نا وڑنگا اسہ چنکو بولی سینا گرفت آن تینے کشنگ کتون گڑا ڈیجیٹل وخت ئٹ لمئی بولی تون اوار ہننگ کن ننے کرن آک لگور۔ داسا دا کاریم ءِ ہر اسہ بلوچ تنظیم تینا طاغت نا کچ تینا کوپہ آتیا ارفہ، ولے داڑکن ہر بلوچ ورنا ءِ سخت حالیت آتیٹی ننتون ہم کوپہ مروئی تمو انتئیکہ راج آتا بولی راجی بقا نا ضامن ءِ ۔

بلوچ و بلوچ نا لمئی بولیک آبات مریر۔

بلوچ اسٹوڈنٹس ایکشن کمیٹی