عطاء شادءِ زند ءُ ازم ءِ پجارے

“بلوچی زبان اے ھند ءِ سیرتریں زبان اِنت۔”

عطاء شاد

بلوچ اسٹوڈنٹس ایکشن کمیٹی

عطاء شادءِ زند ءُ ازم ءِ پجارے

:زِند

عطاشاد 1939 ءَ سِنگّانی سر کیچ ءَ ودی بیتگ۔ آئی ءِ اسل نام محمد اسحاق بوتگ ءُ وھدیکہ آ وانگجاہ ءَ وانگ ءَ شُتگ گڑا آئی ءِ نام اے ھاتر ءَ مٹ کتگ ءُ محمد عطا ایر کنگ بیتگ کی آئی ءِ دگہ ھم تبکے ءِ نام محمد اسحاق بیتگ۔ عطا ءِ  پِت ءِ نام لال خان بیتگ۔ واجہ ءَ  بنداتی وانگ چہ گورنمٹ ہائی اسکول تربت کیچ ءَ دربرُتگ، دھمی ءِ چکّاس 1956 ءَ ماں گورنمٹ ہائی اسکول پَنجگُور ءَ داتگ ءُ سوبین بیتگ۔ پدا  دوازدہمی تبک چہ گورنمٹ کالج کوئٹہ ءَ ماں 1959 ءَ دربُرتگ۔ بی اے 1962 ءَ ھم چہ گورنمٹ کالج کوئٹہ ءَ ونتگ۔ شائری ءِ بندات 1955 ءَ چہ اسکول ءِ زمانگ ءَ کُتگ۔ بندات ءَ آئی ءَ ماں اردو ءَ شائری کُتگ بلے رند ءَ آئی ءَ بلوچی ءَ شائری کُتگ۔ کار ءُ کسب ءِ ھساب ءَ آہی ءَ ڈرامہ نگارریڈیو پاکستان کوئٹہ ءَ کار کُتگ۔ دیمتر ءَ بلوچستان ھگومت ءِ تعلقات عامہ ءِ ڈائرکٹر بوتگ۔ 9 جون 1972 داں 29 اپریل 1973 ءَ ڈائریکٹر ءُ ایگزیکٹیو ڈائریکٹر آرٹس کونسل ( ادارہ ثقافت بلوچستان ) ءِ اگدہ ءِ سر ءَکار کُتگ۔ 1973 داں 1983 ءَ بلوچستان ھگومت ءِ تعلقات عامہ ءِ ڈائرکٹر بوتگ۔ رند ءَ 9 جون 1983 داں 10 دسمبر 1986 ءَ آئی ءَسیکریٹری اطلاعات ءُ نشریات، لیب ءُ گوازی ءُ دودمان بلوچستان ءِ جھت ءَ کار کُتگ۔ 1996 ءَ داں آئی ءِ مرگ 13 استپان(فروری) 1997 ءَ آ یک رندے پد ءَ ڈائریکٹر جنرل آثار قدیمہ بلوچستان ءِ اگدہ ءِ سر ءَ کار ءَ بوتگ۔ آئی ءِ نوکری ءِ کل وھد 34 سال بوتگ انت۔ آئی ءَ وتی زندءَ بازیں مُلکانی تر ءُ تاب کتگ کہ اشانی توک ءَ ایران، سعودی عرب، امریکہ، آسٹریلیا، تھائی لینڈ، اٹلی، چین، برطانیہ، ڈنمارک، ترکی، متحدہ عمارت، عمان، سنگاپور ءَ بحرین ھوار انت۔ عطاشاد ءِ سئے چُک انت کہ آہانی نام حمل شاد، رُژنا شاد ءُ مھنا شاد اَنت۔

:اِزم

سال 1950ءَاے دیم بلوچی شاعریءَ را نوکیں شاعری پمیشکہ گشگ بیت کہ اے دورءَ عطا شادءِ وڑیں لچہ کار ودی بنت کہ آ نہ تہنا نوکیں فارم ءُ ہئیتءِ اندرءَ تجربت ءُ کتہ کاری کن اَنت بلکیں بُنگپ ءُ تکینک ءُ چہرگی زبان(figurative language) شرتریں آزموگ کاریءِ بنھشتءَ ایر کنت۔  چدو پیسر چوشیں مانترے(turning point) گندگءَ نئیت بلے عطا بلوچی نوکیں شاعریءِ بازیں راہ ءُ دراں پچ کنت۔  بِلّے کہ عطا شادءِ بنپد بلوچی کلاسیک شاعریءَ گوں بندوک بنت بلے آ کلاسیکءِ روایتانی نوکساچی ءُ گیش کنگ(modify)ءِ ازمءَ زیات کاربندیت ءُ ھماھاں نوکیءِ کالبءَ گوں جتائیں درشانداب ءُ توارےءَ بلوچی لبزانکءِ بندپترءَ یک نوکیں نامےءِ گیشی آرگءَ سوبمند بیت۔ پمیشکہ مروچی عطا شاد نہ تہنا مزنیں شاعرے بلکیں آ پہ وانوکاں یک سَبکے جوڑ بوتگ پرچا کہ بازیں لچہ کارےءِ واھگ ہمیش اِنت آ عطا شادءِ درشانداب ءُ گالجوڑاں کارمرز بہ کنت۔ اے درستیں  کلاسیکل بوگءِ ھاسیت اِنت پرچا کہ کلاسیکءِ مانا ہمیش اِنت کہ سد سالءَ پد اوں ھما لزتءَ بہ دنت کہ  سد سال پیشءَ داتگ ئِے۔ مروچی ھم عطا شاد ھما پیم وانگ بیت ءُ آئیءِ شاعری ھمینچو نوک اِنت کہ زیک بوتگ۔

آئی ءِ لبزانکی کارانی تہا آئی ءِ شائری ءِ کتاب انت کہ آہانی تہ ءَ دو اردو شائری ءِ کتاب سنگاب  ءُ برپاگ  اَنت۔ آئی ءِ بلوچی شائری کتاب روچ چگر ءُ شپ سہار اندیم انت۔ پٹ ءُ پول ءِ پڑا آئی ءِ کتاب بلوچی نامہ  درین، گیچین، اردو بلوچی لغت، ہفت زبانی لغت (بلوچی ءِ بہر) انت دومی آہی ءِ کتاب بلوچی کلیات ” گلزمین ” ءُ اردو کلیات،”جب ورق نیند الٹے گی“ھوار اَنت۔ آئی ءَ وتی زند ءَ بازیں ایوارڈ ءُ داد گپتگ چُشکہ صدارتی ایوارڈ پہ حسن کارکردگی 1983ء ستارہ امتیاز  1992ءَ ھاسیں ایوارڈ، وزارت اطلاعات ءُ نشریات حکومت پاکستان، ریڈیو ایوارڈ ءُ فیلوشپ انٹرنیشنل ٹرینگ انسٹی ٹیوٹ، سڈنی، آسٹریلیا۔ آئی ءِ زند ءُ مرگ ءَ چہ پد بازیں ھند ءُ جاھے ءُ ادارہ آئی ءِ نام ءَ ایرکنگ بوتگ انت۔ چُشکہ گورنمنٹ عطا شاد ڈگری کالج تربت کیچ، عطاشاد آڈیٹوریم ادارہ تقافت بلوچستان کوئٹہ، عطاشاد پارک تربت کیچ، عطاشاد روڈ (انکسکمب روڈ) کوئٹہ، عطاشاد روڈ تربت۔ عطاشاد 13 اُستپان 1997 پشمبے روچ ءَ کوئٹہ ءَ اے دنیاءَ یلہ کنت ءُ آئی ءِ مانش کوئٹہءَ اِنت۔

لبزانکی کمیٹی بلوچ اسٹوڈنٹس ایکشن کمیٹی