جہہ بجن بے ساری ءُ بے زانتیءَ شہمات کن

پنتاک

جہہ بجن بے ساری ءُ بے زانتیءَ شہمات کن

!بلوچ وانندگاں
مرچی دنیا علم ءُ زانت ءِ پِڑءَ گشادیءَ گوں دیمءَ روان اِنت، دنیاءِ ایدگہ چاگردانی نودربر سائنسی،سیاسی، لبزانکءَ ھوار ایدگہ کُلیں پڑاں بھر زیر اَنت ءُ وتی بود ءِ ھساب ءَ چاگرد ءَ گہتری آرگ ءِ جہد ءَ ھوار اَنت۔ وھدے دنیا ءِ مزن شہدربرجاہانی گپ بیت گڑا اودءَ ساچشتی بودانی سرءَ کار، لبزانکی، معاشی، سیاسی مراگش، وانگ ءُ زانگءِ سرءَ تران، ءُ نوکیں پٹپولءِ تہ ءَ نگدی چم چارگ ءِ درور مارا دیم ءَ کیت۔ وانگی ادارہانی تہ ءَ آزاتیں چاگردے بیت کہ اودءَ نودربر زانشتی مراگش، سمینار ءُ ایدگہ وانگی مراگہ برجم دارگ بنت داں نودربرانی زانشتی گہبودی سرءَ کار بہ بیت۔ دومی نیمگءَ ھرچ وانندگیں چاگردءَ وتی دانشور ءُ استادانی مزنیں عزت ءُ شرپے است اِنت۔ یک چاگردے ءِ گہبودی ءُ دیمروئی ءِ ھاترءَ استاد ءُ دانشورانی مزنیں کِردے است۔ ھما چاگرد کہ دانشور ءِ شرپءَ نہ زانت آ چاگرد ھچبر دیمروئی کت نہ کنت۔

!باسمائیں بلوچاں
دنیاءِ ھمک چاگردءِ وانگی نظام ہما چاگردءِ رسم ءُ رواجانی رھبندءِ جہگیریءَ کنت۔ چوناھا سیتمندیں وانگی نظام ءُ نصابی کتاب کہ ھست انت گڑا ھما راجءِ دودمانی زانشت، بندپتر ءُ ربیدگی تب ءُ میلاں چہ اڑ دیگ بیت، بلے چوشکہ ما وتی وانگی نظام ءُ ادارہ یا کہ نصاباں گند ایں گڑا انچوش سما بیت کہ اے بلوچءِ ربیدگ، بلوچءِ ھزاراں سالءِ مہرگڑھءِ دودمان، ہما دودمان کہ دنیاءَ جولاھگیءِ ھنر ئِے سوج داتگ، ایش ہما دودمان انت کہ اولی رندءَ دنتانءِ حکیمءِ بابتءَ فرانسی دمبزانتاں منانک رستگ، بلے مرچیگیں اے نصاب، اے جوڑ کرتگیں وانگی ادارہانی دست چیراں جوڑ بوتگیں مردم مروشی بلوچءِ بندپتر یا کہ دودمانءَ ولگوج کنگءَ انت۔ اے وانگی نظام مردماں سنٹ کنگءَ انت، مردماں جی حضور، ھنرباز جوڑ کنگءَ انت، اے تعلیمءَ در اتکگیں آفسر بلوچ مہمانداریءِ روایتانی چپءَ روگءَ انت۔ بلوچ زانتکارانی کم شرپیءَ کنگءَ انت۔ کانسٹیبل نظامءِ تعلیم نہ شریں انسانے پیداک کت کنگءَ انت نئیکہ شریں بلوچے بس چار بوٹ چٹوکیں آفسر جوڑ کنگءَ انت۔

!مڑاھداریں بلوچ راج
یک روچے پیسر بلوچ اسٹوڈنٹس ایکشن کمیٹی تربت ھنکین ءِ نیمگ ءَ یک وانگی دیوانے (لیکچر) ماں تربت یونیورسٹی ءَ“ بلوچ نودربر ءُ دنیا ءِ نوکتریں وانگی لوٹ” ءِ سرھالءَ اڈ داتگ اَت کہ آئی ءِ تْرانکار پروفیسر ڈاکٹر منظور بلوچ اَت۔ ڈاکٹر منظور بلوچ کہ یک استاد، ندکار، بلوچستان شاہ دربرجاہ ءِ براہوی زبان ءِ ڈیپارٹمنٹ چیرمین ءُ تربت یونیورسٹی ءِ سینیٹ ءِ باسک اِنت۔ ڈاکٹر منظور بلوچ یک بلوچ دانشورےءِ بوگ ءَ ابید تربت شہرءُ مئے نودربرانی مھمان اَت کہ اینکس دورءَ چہ اتکگ اَت۔ ڈاکٹر منظور بلوچ تربت یونیورسٹی انتظامیہ ءِ دست ءَ وش اتکی ءِ جاہءَ گیٹ ءِ دیم ءَ دارگ بوت ءُ آئی ءَ کم شرپ کنگ بوت کہ تو گوں ہمراہاں پترت نہ کن ئے دانہ تو وتی ہمراہیں نودبراں یل نہ کن ئے۔ رجسٹرار، سیکورٹی آفیسر ءُ پولیس آئیءَ گوں ھراب ءُ بدیں روشتاں پیش کائینت۔ بلے ڈاکٹر منظور بلوچ بلوچ دوداں سرپد بیت ءُ آھانی ارزشت ءَ زانت پمیشکا واجہ ءَ واتر بیت ءُ اے گوشیت کہ من وتی نودربریں ھمراھاں ابید شمے ادارہ اتک نہ کناں کہ من ادءَ چاہ ءِ ورگءُ ترگءَ نئیتکگاں بلکیں من استادے آں ءُ نودربراں گوں علمی مکالمہ ءُ آہاں گوں زانشتی دیوان ءَ اتکگاں۔
واجہ منظور یونیورسٹی ءِ گیٹ دپءَ کم شرپ کنگ بیت ءُ راہ دیگ بیت۔ اے روشت نہ تہنا علم دُژمنیں عملے بلکیں بلوچی دود ءُ ربیدگءَ پہ زبرّیں ھکلے، یک شہماتے پہ استاد ءُ زانتکارےءَ، چریشیءَ ابید تربت یونیورسٹی نہ کتاب گوزگءَ کلیت نئیکہ نودربر، نئیکہ Extra Curriculum activities۔

!بلوچ زانندگاں
بلوچءِ ھستیں وانگی نظام نوں ہمے پیمءَ جوڑ کنگ بوتگ کہ مارا سما بوگءَ انت کہ اے وانگی ربیدگ، ادارہانی روشت کہ آنچیں کلچرے پیداک کنگءَ انت کہ ما ایشیءَ کالونیل سب کلچرءِ نامءَ دات کت کنیں پرچا کہ اے سب کلچر بلوچ کلچرل فاؤنڈیشنءَ را ولگوج کنگءَ انت، اے مروچی وانگی ادارہ شَپُک، تنخواہ خور، بوٹ چٹوک پیداک کنگءَ انت ءُ اے مردم گڑا بلوچءِ کلچرل فاؤنڈیشنءِ پادمال کنگءَ ہم چک ءُ پد نہ بنت، اے سب کلچرل فاونڈیشن کالونیلے، بہ گندئے اے سب کلچرل نہ وانگی ادارہانی توکءَ بلوچ جنکانی تپاوتءَ بہ زانت ءُ نئیکہ بلوچ زانتکارانی مردمانی۔ اگاں وانندگیں نودربر یا کہ زانندگیں بلوچ زانتکاراں اے بابتءَ گامگیجے مہ زور ایں گڑا آ روچ دیر نہ کنت کہ بلوچ ءِ ربیدگءِ جنازہ چست بیت۔
اے ناسوزیں زہنیت ءِ ھلاپءَ ما اوشتگ ءِ فیصلہ کتگ ءُ زہرشانی ءِ نیمگءَ روگیں۔ شما کُلیں نودربر ءُ استاداں گوں دزبندی اِنت کہ مئے ہمراہ بہ بئے داں ما تپاکی ءَ گوں وتی جہدءَ بہ کنیں۔ بیا ایت اے زورانسریں رویشت ءِ ہلاپ ءَ پاد کائیں ءُ وتی ادارہاں پہریزیں کہ ادارہ بلوچ ءِ اَنت۔

واجہیں بلوچ زانتکاراں
ڈاکٹر منظور ءِ وڑیں استادانی کم شرپی مئے چاگردی دود ءُ استادءِ عزت ءِ سرءَ شہماتے۔ یک پروفیسرے ءِ چو بے ازت کنگ سجوئیں استادانانی کم شرپ کنگ اِنت۔ ما شمئے نودربر ایں ءُ شما مئے استاد ات، بلے مئے گورءَ استاد ءِ عزت ءُ نودربر ءِ کرد انچو پادمال کنگ بیتگ کہ مئے چاگردءَ لائکیں سر ءُ بودناکیں کردار دراھگءِ جاہءَ نابودیں سرگ دراھگءَ اِنت۔ ادءَ کہ استادانی بے توار کنگ بنت ءُ نودربر توپگ ءُ ٹوپانی چیرءَ وانینگ ءَ مجبور کنگ بنت اودءَ ساچشت ءُ بودناکیں سر در نئیت۔
مئے چاگرد بس نوں تنخواہ خوریں ءُ لاپ گروکیں مردم جوڑ بوتگ، بلوچ پدمنتگ بیت یا کہ بلوچءِ اجتماع نادراہی وانگی نظامءِ چیرءَ ساہ کشیت ءُ بلوچ زانتکاریں مردمانی کہ دردءِ سر نہ انت گڑا ما وتی انسان بوگءِ سرءَ ھم شک بہ کنیں، پرچا کہ بلوچ بوگ انگت مزنیں گپے۔

زہرشانی ءِ رمس: 2023-11-16
جاھ: تربت شہدربرجاھ کیچ

بلوچ اسٹوڈنٹس ایکشن کمیٹی