BSAC Struggling For Knowledge And Unity 
This Blinding Absence of Light
نبشتہ کار: طاھر بن جلون
چمشانک : وھاب ودار بلوچ
بلوچ اسٹوڈنٹس ایکشن کمیٹی
اے گدار طاھر بن جلون ءِ نبشتہ کتگیں گدارے ۔ طاھر بن جلون 1944 ءَ مراکش ءِ شھر فاسّ ءَ ودی بیت ۔ آ چہ رباط ءِ محمد خامس مزن شھدربرجاہ ءَ فلسفہ ءِ ڈگری ءِ گیپت ءُ آ سابلانکہ ءَ فلسفہ ءِ وانینگ ءَ بندات کنت ۔
طاھر بن جلون ءِ جند چوناھا نودربرانی ھمبراھی ءَیک سیاسی چست ءُ ایر ےءِ سوب ءَ زندان ءَ ھم برگ بیت ، ایشانی سرءَ سک ءَ باز زُلم ھم کنگ بیت ۔ ھمے زاندان ءِ میانی روچاں طاھر بن جلون شائری ءُ گدار نویسی ءَ بندات کنت ۔
اے گدار اولی رند ءَ 2000 ءِ دھک ءَ فرانسیسی زبان ءَ شنگ کنگ بیت ءُ پدا عربی زبان ءَ رجانک کنگ بیت ءُ ایشی ءَ رند 2002 ءَ انگریزی زبان ءَ چاپ شنگ بیت ۔
چوناھا اے گدار یک راستی ءِ کہ 1971 ءِ لھتیں گھگیری کنوکیں ٹولی ءِ مراکش ءِ سلطان ءِ سرا آھی ءِ ودی بوگ ءِ روچ ءِ مراگش ءِ سرا اُرش کنت ۔ ءُ آھی 100 ءَ چہ گیش مھمان کش ایت ءُ سلطان ءِ جند رکّیت ءُ سلطان ءِ فوج اے گھگیری ءَ بے سوب کن اَنت ءُ اے گھگیری کنوکیں ٹولی ءَ دزگیر کن اَنت ءُ جتا جتائیں زندانانی تام چاشین اَنت ۔ آھاں ھنچیں زندانے ءَ بر اَنت کہ اودءَ مردم ءِ تہ ءَ دوبر زندگی کنگ ءِ سنچ ھم ودی نہ بیت ۔ بلے پدا ھم سلطان ایشاں چہ لھتیں ھما وھد ءَ کُش ایت ءُ لھتیناں 10 سالءِ واستہ ماں زاندان ءِ تھاریں کوٹی آں پہ مرگے واستہ یل دنت ۔ بلے ھنچو گمان بیت کہ اے زندان تھنا مردم ءِ کشگ ءِ واستہ اڑ کنگ بوتگ ۔ بلے ھمے زندان ءِ تہ ءَ یک زندانی ئے در کنگ بیت کہ آھرا گُشگ بیت “ترا یک ھم میان استمانی صحافی ئے ءَ گوں ءَ گَپ کنگی نہ اِنت ” بلے ھمے زندانی اے گَپاں طاھر بن جلون ءِ کِرّا کنت ءُ آ اے گَپّاں گدارے ءِ دروشم ءَ دیما کار ایت ۔
چوناھا ھمے سلطان ءِ مراگش ءِ تہ ءَ مزنیں رابے بیت ۔ ھمے اُرش ءِ وھد ءَ یک نوجوانے گون بیت کہ آ ھمے سلطان ءِ یک گلامے ءِ چُک بیت کہ آ گلام سلطان ءِ سک ءَ نزّیک بیت ءُ ھمے گلام وتی لوگ بانُک ءُ چُکّاں چہ گیش سلطان ءُ دگرانی جنک ءُ لوگ بانکُاں گیش ارزشت دنت ۔
ھمے نوجوان ءِ دزگیر کنگ ءِ وھد ءَ آ وتی دستاں پہ پِت ءَ ٹال کنت ءُ پِت گُش ایت “واجہ ! اے منی نیمگا چہ مُرتگ ءُ منی باریگءَ ایشیءَ کُش ئے یا ھرچ وَڑیں سزائے دئے ترا رزا اِنت۔ “
چوناھا اے ٹولی ءِ گھگیری کنگ ءِ سوب آھانی ءُ دگہ لس مھلوک ءُ زالبولانی ھَکّانی واستہ پاد آھگ اَت کہ اودا سلطان وتی دِل ءِ تبیگاں کنگ ءِ اَت ، اودءَکہ ھرچ شوکیں زالبولے است اَت گڑا اول سرءَ آ سلطان ءِ کِرّا برگ بوتگ اَت ۔
اے زندان ءِ تہ ءَ دراھیں مردُماناں نو بازیں سال بوتگ اَت کہ آ زندان ءَ بوتگ اَتاں ءُ ھمے ازیتانی چیرءَ زند ءَ کنزینگ ءَ اَتاں بلے نو آھانی تہ ءَ زندگ بوگ ءِ امیت نیست اَت ۔
آھانی تہ ءَ دراہ وتی زند ءِ کسھانی ھیالاں گوں گار اَت اَنت ۔ ھرکس وتی وتی کسھےءِ میان ءِ اوشتاتگ ءُ جنزگ نہ لوٹگ ءَ اَت ۔ ایشانی تہ ءَ یکّے گوں وتی مھرءِ ھیالاں ھمگرنچ اَت ءُ گوں یکے ءَ ھیالی دروشم ءَ گَپ ءِ اَت ۔ یکے وتی مات ءِ کسھاں گوں دچار اَت ءُ وتی ھر روچی ایں جاورھالانی کسھاں آرگ ءَ اَت ءُ گوں مات ءِ گون ءَ کتگیں گَپاں گیر آرگ ءَ اَت ءُ ماں اے ھیالاں گار اَت کہ من وھدے اے زندان ءِ تہ ءَ ساہ بہ دیاں گڑاں منی مات ، گھُار چی کن اَنت ؟ یکّے ماں وتی ھیالی دنیا ءَ گار اَت ۔ چوناھا ھرکس وتی ھیالی دنیا ءِ تہ ءَ گار اَت ءُ کس ءَ نہ زانت کجام دنیا ءِ تہ ءَ اِنت۔
بلے راستی ایش اَت کہ اے دراھیناں ھمدءَ مرگی اَت ۔
اے گدارءِتہ ءَ زندان ءِ ھما دراھیں نہ وَشی ھوار اَنت کہ آ زندگ بوگ ءِ امیت ءَ کُش اَنت ۔
چوناھا زندان ءِ تہ ءَ ھر سئے یا چار روچءِ تہ ءَ یک کَسے چرے ازیتاں آجو بیت ءُ پہ دائمی واب بیت۔ دراھینانی مرگءِ سوب جتا جتا بنت ۔ اسلا اے زندان ءِ کوٹی سَکّ ءَ تنک بنت ءُ سک ءَ کسان بنت کہ ایشانی تہءَ مردم اوشتات ہم نہ کنت ءُ تھنا پہ ساہ زورگ ءِ ھاترءَ ھرچ کوٹی ءَ کسان کسانیں ٹُنگ پِر اِنت ءُ کوٹی سَکّ ءَ تھار اَنت ، چوناھا زندان ءِ جندوت سکّ تھار بیت بلے اے وا سرے دیم ءَ اَت۔
اے زندان ءِ تہ ءَ کسّ ءَ را اوں آسودگی ءِ سرا پریات کنگ ءِ ھک نیست ، اگاں یکّے ءَ پریات کُت گڑا آھیءِ کوٹی ءِ تہ ءَ وڑ وڑیں لولُک (زوم ) یل دیگ بیت ۔ آھاناں شَرّیں ورگ پہ ورگ ءَ نہ رس ایت ، آھانی نان سکّ ءَ ڈڈ بنت ءُ نارشت باریں کدی ایناں کہ سَکّ ءَ بوہ کن اَنت ۔
اے دراہ نوں کم کم ءَ مران بنت ، لھتیناں ھمے زندان ءِ تہ ءَ یل داتگیں لُلُک وَر اَنت ءُ کُش اَنت۔ لھتیں زندان ءِ تہ ءَ شداربنجل جن اَنت ءُ مرگ ءِ آماچ بنت ۔ لھتیناں جتا جتائیں نادراھی وتی ھرجان جن اَنت ۔ یکّے ھمے زندان ءِ کوٹی ءِ تہ ءِ لانک بوج جاہ ءِ بدیں بوہ ءَ چہ ساہ زُرت نہ کنت ءُ مِر ایت ءُ لھتیں زوراک ءِ لَٹ ءُ کُٹ ءَ چہ مر ایت ۔یکّے کہ آ زندان ءِ تہ ءَ داں لھتیں روچ ءَ ورگ نہ وارت گڑاآئی ءَ( کبض ) کہ یک ھترناکیں نادراھی ئے ھمیشی سوب ءَ مِر ایت ۔
ھمے زندان کہ ڈی بلوک (D-block) ءِ تہ ءَ کہ 23کس بندیگ بیت آھانی تہ نی ایوکءَ 4 کس سَر کئیت کہ آ چہ اے زندان ءَ کشّگ بنت بلے نزاناں کجا برگ بنت ، اے چارینانی تہ ءَ تھنا یکّے وتی لوگ ءَ سَر بیت ۔
چوناھا اے گدار یک زندانی کسھے کہ زندان چوں بنت آھانی تہ ءَ کجام کجام رنگیں ازیت دیگ بیت ۔
اے گدارءِ ارزشت اِیش اِنت کہ اگاں ایشی ءَ یک بلوچ ئے بہ وان ایت ، گڑاں آئیءِ ھیالءُ زہن ءَ ھما بلوچ کاینت کہ آھانی تہ ءَ باز ءَ 20 ، 20 سال اِنت کہ ھمے زندان ءِ ازیتاں چہ گوزگ ءَ اَنت ءُ بگندئے نوں آھاں زندگ بوگ ءِ امیت ھم کَل کتگ اَنت ، یا بہ گندے کشگ ءُ ماں ویرانیں لداں دور دیگ بیتگ اَنت ءُ کس سہی نہ اِنت، یا بہ گندے زندانءِ نہ سگیں ازیتاں چہ نیست اَنت۔ کسے وتی چُکءِ یاتءَ ءُ کسے وتی مات ءِ یات ءَ بیت یا کسے وتی ہمبل ءُ بہشتیں زمین ءِ ترانگ ءَ بیت۔
اے گدار ترا ھمیشانی اکساں پیشدار ایت ءُ بگندے آیانی سرءَ بوکیں زُلم ءُ جبر ءِ ھلاپ ءَترا پاد ایگ بہ پرمائیت ۔
