BSAC Struggling For Knowledge And Unity 
بلوچ اسٹوڈنٹس ایکشن کمیٹی نا پارہ غان بلوچ لٹریسی کیمپئن نا بناء مروک مہم نا ردئٹ ”سکندر یونیورسٹی خضدار ءِ فعال کننگ“ نا بابت خضدار پریس کلب ئٹی اسہ انٹریکٹو سیشن اس اڈ تننگا۔ دیوان نا بشخ آتیٹ تران، ڈاکومنٹری، پینل ڈسکشن، ڈرامہ، ٹیبلو و کتاب مُچی اوار ئسر۔
تران کروک آتیٹ بساک نا بنجاہی کارگشاد اظہر بلوچ، بنجاہی کمیٹی نا باسک بالاچ بلوچ، ڈاکٹر باری آجو و بساک خضدار زون ئنا کارمستر جویریہ بلوچ ئسر۔ اندن پینل ڈسکشن نا موڈریٹر نعیم بلوچ و پینسلٹ آک عمران بلوچ، عادل بلوچ و احمد بلوچ ئس۔
دیوان نا بناء راجی سوت آن مس، اوکان پد بساک خضدار زون ئنا کارمستر جویریہ بلوچ زالبول آتا خواننگ نا بابت تران کرے، اندن داکان پد بساک نا بنجاہی کمیٹی نا باسک بالاچ بلوچ، بلوچ لٹریسی کیمپئن نا بابت شابیت تران کریسہ پارے کہ بی ایل سی بساک نا پارہ غان 2021 ئٹ بناء مروک اسہ پروگرام ئسے ہرانا مسخت بلوچستان ئٹ یا بلوچ اکثریتی علاقہ غاتیٹ خواننگ ءِ زیات آن زیات کننگ ءِ۔
دیوان نا ایلو بشخ ئٹ اسہ ڈاکومنٹری اس مونا ہتنگا ہراٹی سکندر یونیورسٹی تون اوار خضدار نا جتاء علاقہ تا تعلیمی ادارہ غاتا ویل آتے نشان تننگا۔ اوکان پد دیوان نا ایلو بشخ پینل ڈسکشن ئس ہرانا سرحال ”خضدار ئٹ خواننگ نا ویل آک و ذمہ واریک“ ئس ہرانا زی آ پینسلٹ آک شابیتی ئٹ ہیت کریر۔ دیوان ءِ مُستی دریسہ خواننگ نا ویل و سوب آتا زی آ اسہ ڈرامہ اس مونا ہتنگا۔
اوکان پد بساک نا بنجاہی کارگشاد اظہر بلوچ بلوچستان ئٹ پرائمری و ہائیر ایجوکیشن نا بابت شابیتی ئٹ تران کریسہ پارے کہ دا وخت تیوہ غا بلوچستان ئٹ 9 یا 10 یونیورسٹی ءُ و دا ہم معاشی ویل آتیتون اوار کیہی ویل آتا گواچی ءُ۔ دیوان نا ایسری تران کروک ڈاکٹر باری آجو ئس ہرا گواچن آ خواننگ و ننا ذمہ واری تیا ہیت کرے۔
دیوان نا ایسر ئٹ خضدار ئٹی خواننگ نا ویل و اوفتا ایسری نا بابت اسہ ٹیبلو اس مونا ہتنگ آن پد دیوان ایسر کننگا۔
مرکزی ترجمان بلوچ اسٹوڈنٹس ایکشن کمیٹی
