گوگی، ماتی زُبان ءُ بلوچ– رفیق بلوچ

گوگی، ماتی زُبان ء بلوچ
رفیق بلوچ ،بنجاھی کمک کارگشاد (بساک)

مروشی نوآبادیاتی نِزام (نظام) ءِ سر ءَ نبشتہ کُتگیں بازیں وانگی مواد کہ مارا دست کپ اَنت آھانی تہ ءَ اَپریکی (افریقی) نبشتہ کارانی مزنیں لڑے ھم ھوار اِنت۔ پینن، چیناوا اچھیبے، امیلکا کیبرال ءُ دِگہ بازیں کہ اِیشانی تہ ءَ کینیا ءِ نامداریں نبشتہ کار گوگی تھیانگو ھم ھوار اِنت۔ گوگی ھما زمانگ ءَ ودی بیت کہ کینیا ءِ سر ءَ زُورگِریں برتانیہ ءِ کْوزہ (کبزہ) بیت۔

گوگی کْوزہ گیر ءِ زُوراکیاں جوان پجّا کار اِیت، چی ءَ کہ گوگی ھمُک پندل چہ نزّیک ءَ دیستگ۔ آئی جند، آئی لوگ ءِ مردُم ھمے زُوراکیانی آماچ بوتگ اَنت۔ گوگی بازیں کتابے نبشتہ کُتگ، ءُ گوگی ایسٹ اپریکہ (افریقہ) ءِ اولی نبشتہ کار بیت کہ انگلش ءِ تہ ءَ وتی
کِتاب‏‎ چاپ کُتگ کہ آئی نام ” ویپ ناٹ چائلڈ ” بیت۔

‏‎ھمے دور ءَ گوگی یک تھیٹر پروگرامے اَڈّ دنت کہ آئی تہ ءَ اپریکی (افریقی) زُبان “گیکیو” کارمرز کنگ بیت۔ اے اَمَل ءَ استان اِیر بُرت نہ کنت ءُ گوگی دزگیر کنگ ءُ زِندانی کنگ بیت۔ گوگی گْوش اِیت کہ من زِندان ءِ تہ ءَ  ھمے جیڑ اِتگ کہ من مُدام انگلش نبشتہ کُتگ من ءَ کس ء دزگیر نہ کُتگ، منی نِزّ ءَ منی انگلش نبشتانک گیش تْرندتِر بوتگ اَنت۔ من دری زُبان ءَ استان ءُ آئی زُوراکیانی سر ءَ گیش نگد کُتگ، بلے من انچو کہ “گیکیو” نبشتہ کُتگ من دزگیر کنگ بوتگ آں۔ “  اِد ءَ چہ من جیڑ اِت کہ جیڈھے الّم ھست، بلکیں جیڑہ ایوک ءَ زُورگِریں استان ءِ گوں کینیائی زمین ءُ مھلوک ءَ نہ اِنت، بِہ گِندے مئے ھمّک چیزّ ءِ گم ءَ اِنت کہ مئے پجّار ءَ سرجم کنت گُڑا آئی سر ءَ کْوزہ (کبزہ) کنگ ھژدری بیت۔ ھمد ءَ چہ من زُبان ءِ سر ءَ گیش کار کنگ بندات کُت۔

‏‎یک اِھوالکارے گوگی ءَ چہ جُست کنت” واجہ گوگی اپریکی (افریقی) زُبانانی سر ءَ تو سک باز گپّ کن ئے؟ اِیشی ءِ پشدر چی اِنت؟ “گُڑا گوگی پسّہ دنت۔ “ منی ھیال ءَ زُبان اِنسانی پجّار ءِ مستریں شون ءُ نشانی اِنت، انسانی رُو (روح) ءَ گوں بستگیں چیزّے۔ من سادگیں لبزانی تہ ءَ ھمے گْوش آں کہ زُبان پہ راج ءَ یا پہ انسان ءَ ھرچی اِنت، بزاں کہ انسان یا کہ راج ءَ سرجم کنت۔

اِیشی دَرور چو اے پیم اِنت من ءَ یک راجدپترے ھست، آ دپتر من چہ وتی پِت ءُ پیرُکاں اِش کُتگ۔ اے راجدپتر منی یاتانی ءُ ھیالانی بھر اِنت، بِل کہ نبشتہ نہ اِنت، وھدے من ءَ چہ منی زبان پُلّگ بیت، گُڑا چہ من منی گْوَستانک (تاریخ) ءُ یاداشت ھردوئیں پُلّگ بنت۔ زُبان گوں منی ربیدگاں بندوک اِنت، زُبان گوں منی جیڑگاں بندوک اِنت، مرشی کہ من چیزّے جیڑاں، منی دُرستیں جیڑگ اپریکی (افریقی) زُبان “گیکیو” ءِ تہ ءَ بنت۔ اگاں منی زبان چہ من ءَ پُلّگ بیت گُڑا منی جیڑگ ہھم چہ من ءَ پُلگ بنت، جیڑگ سسّا (تخلیق) کنگ یا سازگ ءِ بُنیات اِنت، منی کہ جیڑگ ھلاس بنت بزاں منی بودناکی چہ من ءَ پُلّگ بیت۔ ھمُک زُبان ءَ ھما ھند ءِ دود ءُ ربیدگ، دپتر، یاداشت، اِزم، سازءُ زیمل ءُ کِسّہ  گون اَنت۔

‏‎وھدے یک دِگہ زُبانے بئیت ءُ منی زُبان ءِ تہ ءَ جاگہ ءُ کْوزہ (کبزہ) بِہ کنت بزاں آ منی دود ءُ ربیدگ، دپتر، یاداشت، اِزم، ساز ءُ زیمل، کِسّہ ءُ تیوگیں ھستیاں گوں وت بارت ءُ نوکیں دُرستیں چیزّ گوں نوکیں زُبان ءَ بندوک بنت کہ منی پجّار ءَ مُجانی تہ ءَ گار کن اَنت۔ پمشکا من گْوش آں کہ زُبان دُراھیں چیزّ اَنت۔

‏‎ھمے گُلگدار ءِ تہ ءَ ءَ گوگی گْوش اِیت” برتانیہ ءَ مزنیں جُھدے کُتگ کہ آئرلینڈ ءَ وتی دست ءِ چیر ءَ بِہ کنت، بلے مُدام بے سوب بوتگ، ھمے برتانیہ ءِ لشکر کہ پُروش ورگ ءَ پد واتر بُوَگ ءَ بیت گُڑا راہ ءَ اِیشاں یک برتانیہ ءِ درآمدے دست کپ اِیت کہ ءَ آئرلینڈ ءِ نِندوکے بیت، ھمے لشکر ءِ کماندار ھمے مرد ءَ گْوانک جنت ءُ یکیں جُست ءَ کنت “ کہ ما باز وھد بیت آئرلینڈ ءِ سر ءَ جنگ کنگ ءَ اِنت، بلے بے سوب بُوَگ اِنت، تو مارا گْوشت کن ئے کہ ما چی بِہ کن اِیں کہ آئرلینڈ ءِ سر ءَ کْوزہ (کبزہ) کت بِہ کن اِیں۔؟ “

‏‎اے مڑد (مرد) پسّو دنت “ کْوزہ (کبزہ) کنگ ءِ واستا دو چیز المی اِنت، اولی آھانی ناماں بدل کنگ ءِ جُھد بِہ کن اِت، دومی وتی زُبان ءَ آھانی سر ءَ دور بہ دے اِت”۔ ءُ مرشی ما گِندیں کہ برتانیہ ءَ ھمے دوئیں کار کُتگ اَنت ءُ آئرلینڈ مرشی برتانیہءِ دست ءَ اِنت۔ پرچا کہ نام ءَ وتی تہ ءَ یک پلسپہ (فلسفہ) ءِ گون اِنت کہ ترا پجّارے دنت۔ تو کہ آئی نام ءَ گوں برتانیہ ءِ نام ءَ بدل کن ئے، گُڑا نوکیں دراھیں نامانی بُنیات گوں برتانیہ ءَ بندوک بنت۔ دومی زُبان اِنت، تو کہ اے دوئیں پجّار بدل کُت اَنت، بزاں تو آیاناں برتانیہ ءِ جوڑ کُتگ ءُ پہ آیاں گہ ھِچّ  پشت نہ کپ اِیت۔

‏‎پمشکا نامانی اِنسانی پجّار ءِ تہ ءَ یک مزنیں کِردے ھست، چی ءَ کہ نام گوں ھما جاگہ ءُ زُبان ءَ بندوک اِنت۔ پہ دَرور منی نام گوگی وا تھیانگو اِنت، پت ءُ ماتاں من ءَ ھمے نام داتگ، اے اپریکی (افریقی) نامے ءُ اِیشی ءِ یک وتی بزانتے ھست، بلے برتانیہ (برطانیہ) کہ کَیت منی نام ءِ تہ ءَ  “ جیمز” ھوار کنت، بزاں جیمز گوگی۔ ءُ جیمز سرجم ءَ یک نوکیں پجّارے کہ منی گوم ءَ زُور بندگ بوت۔ جیمز ءِ سیادی گوں اپریکہ (افریقہ) ءَ نہ بوتگ، جیمز ءِ سیادی گوں برطانیہ ءَ بوتگ۔ اِیشی ءِ سیادی گوں اِیسّائیت (عیسائیت) ءِ مزھب ءَ بوتگ، بلے مئے سر ءَ کْوزہ (کبزہ) کنگ ءَ پد برتانیہ اِیسّائیت گوں ھوار وتی نام ھم آؤرتگ اَنت، چی ءَ کہ آھانی گْوشگ بوتگ کہ مئے نام “ھدائی مزھب” ءِ زُبان ءِ تہ ءَ نیست اِنت، اے نام اِنسان ءَ گنھگار کناں، اگاں شُما لوٹ اِت کہ ھُدا شُمارا دوست بدار اِیت، گُڑا اِیسّائیت ءِ پاکیں نام ءَ وتی ناماں گوں ھوار بِہ کن ئے،۔ مئے نام ءُ مزھب دوئیں بدل بوتگ اَنت، مئے مزھب ءِ جاگہ اِیسّائیت، مئے ھُدا ءِ جاگہ ءَ دِگہ ھُدایے، مئے پیگمبر ءِ جاگہ ءَ اِیسّا (عیسی) گیپت ءُ برتانوی نام مئے نام ءَ  گوں ھوار بوتگ اَنت۔

کْوزہ (کبزہ) ءَ چہ رند مئے پُرشگ ءُ دومی کار ھمے کنگ بوتگ، مارا ٹُکّر ٹُکّر کنگ بوتگ، مئے راجدپتر ءِ جاگہ ءَ برتانیہ ءِ گْوستانک (برطانیہ ءِ تاریخ)، مئے مزھب ءِ جاگہ ءَ اِیسّائیت، مئے نامانی جاگہ ءَ انگلش ناماں گِپت ءُ انچوش ما وتی راہ گار کُتگ۔

‏‎یک دِگہ اِھوالکارے ءِ گوم ءَ گوگی وتی نام ءِ سر ءَ شوکیں وڑے ءَ تْران کنت “ من وھدے کہ رُژن دیست، من راہ دیست، وترا پجّا آؤرت، گُڑا من وتی پبلشر ھال کُتگ کہ منی دُرستیں کتاباں شہ لبز “جیمز” ءَ ھلاس بِہ کن ءُ نوکیں ھرچی کِتاب کہ پبلش بیت آھانی سر ءَ اِیوک ءَ “ گوگی تھیانگو” نبشتہ بِہ کن۔  گْوش اِیت کہ پبلشر ھیران بوت ءُ من ءَ پسّویے دات کہ گوگی ساھب چوش مہ کن، دُرستیں دنیا ترا جیمز گوگی ءِ نام ءَ زانت، تو کہ وھدے تھنا گوگی نبشتہ کن ئے مھلوک تئی کِتاباں نہ زور اِیت۔ من گْوشت “ من نوں رُژن دیستگ، من چد ءُ گیشتر برتانوی پجّار ءَ گوں وت ءَ دیم ءَ بُرت نہ کن آں، من پدا وتی اپریکی (افریقی) پجّار ءَ زور آں ءُ دیم ءَ جنز آں۔

‏‎ ھمے اِھوالکار چہ گوگی ءَ جُست کنت “ واجہ گوگی تئی گیشتر کِتاب انگلش ءَ چاپ ءُ شِنگ بوتگ اَنت ءُ رند ءَ تو “گیکیو” ءِ تہ ءَ نبشتہ کنگ بندات کُتگ، اِیشی سَوَب چے بوتگ اَنت؟

‏‎گوگی پسّو دنت کہ “ من انگلش وانگجاھاں (سکولاں) ونتگ، اُود ءَ ھمُک چیز انگلش ءَ اَت۔ شیکسپئر ونتگ گُڑا گل بوتگ آں۔
‏‎دانکہ من وانگجاہ (سکول) ءَ بوتگ آں من انگلش ءِ تہ ءَ بوتگ آں، اُود ءَ ھمُک شے وش اَت، شوک اَت، بلے وھدے کہ من چہ وانگجاہ (سکول) ءَ چُٹّی کُت ءُ وانگجاہ (سکول) ءِ گیٹ ءَ شہ ڈنّ پاد اِیر کُتگ، من زانت ھِچّ وش نہ اِنت، جنگ برجاہ اِنت، مڑدم برگ بُوَگ ءَ اَنت، لوگ سوچگ بُوَگ ءَ اَنت” اے دو جتائیں دنیا اِت  اِنت، یک دنیایے کہ آئی تہ ءَ ھر چیز برابر اِنت، اِیمنی اِنت، اُود ءَ انگلش ھبر بیت، بلے دومی دنیا ءَ جنگ اِنت، زُلم اِنت، اُود ءَ زُبان “گیکیو” اِنت۔ ءُ گیکیو زُبان ءَ گپّ کنوک آئی جنوک، کُشوک، آس دیوک دُرا انگلش ءَ ھبر کناں۔ ھمد ءَ چہ منی دل ءِ تہ ءَ انگلش ءِ واستا یک جتائیں مارِشتے (اھساسے) ءِ ودی بوت۔

وھدے کہ من نبشتہ ءِ نیمگ ءَ اتک آں، من مار اِت کہ اِیوک ءَ انگلش ءَ گپّ کنوک مئے مڑدماں کُشگ ءَ نہ اِنت، بلے انگلش اِد ءَ اپریکہ (افریقہ) ءِ دُرست زُبان ء َھم کُشگ ءَ اِنت، پمشکا من گْوشت کہ انگلش دنیا ءِ زُبانانی کُشوک ءُ کُشندہ (قاتل) اِنت۔” متلب اے نہ اِنت کہ من نپرت (نفرت) کنگ ءَ اُوں، بلے ھَو ھمُک چیز کہ زُورآور ءِ زُوآوری ءِ گیش کنگ ءَ کُمک کنت، من ءَ ء َدوست نہ بیت، انگلش مرشی زُورگِر ءِ زُبان اِنت ءُ  انگلش اپریکی (افریقی) زُبانانی  کُشگ ءَ گون اِنت۔

‏‎من کہ “گیکیو” ءِ تہ ءَ نبشتہ کنگ بِندات کُتگ، گُڑا بازیں مڑدماں گْوشتگ کہ “گیکیو” ءَ مردُم ونت نہ کن اَنت، وانگ نزاناں، تو بلاھیں نبشتہ کارے ئِے، دنیا ترا وان اِیت، گُڑا گھتر ھمیش اِنت تو انگلش نبشتہ بہ کن۔

‏‎گُڑا من گْوشت کہ چوشکہ یک اپریکی (افریقی) مردمے انگلش وان اِیت، آئی رجانک اپریکی (افریقی) زُبانانی  تہ ءَ کنگ بیت، ھمے پیم ءَ انگریز ھم  مئے زُبان ءَ بِہ وان اَنت، رجانک بِہ کن اَنت۔ اے ھمایانی  جیڑہ اِنت، من آھانی زُبان ءَ زانت کن آں، ونت کن آں، بائِد اِیں آ ھم منی زُبان ءَ بِہ وان اَنت ءُ بِہ زان اَنت۔ پِرنچ (فرِنچ) انگلش ءَ رجانک بیت کنت، جرمن انگلش ءِ تہ ءَ بیت کنت، گُڑا دنیا گیکیو ءَ چی ءَ ونت یا رجانک کُت نہ کنت۔ پَرک چہ ھمد ءَ پیداک بیت کہ انگلش چی ءَ زُور منی سر ءَ دور دَیَگ بیت۔

‏‎مردم گْوشاں کہ انگلش میڈیم ءِ ھاتِر ءَ کارمرز کنگ بہ بیت، انگلش مردُماں ھوار کنت، تو کہ گیکیو نبشتہ کن ئے چہ اِیشی ءِ سَوَب ءَ مھلوک ءِ مْیان ءَ زُبان ءِ بُنیات ءَ پَرک کَیت۔ من ھبّکہ اُوں کہ انگلش منی نہ اِنت، منی دُژمِن ءِ زُبان اِنت، گُڑا من ءَ چوں یکجا کُت کنت۔ گیکیو اپریکی (افریقی) زُبانے، مئے جِند ءِ زُبان اِنت، اے مئے تہ ءَ چوں پَرک ءُ دَرک (تپاوت) کار اِیت۔ مارا مئے جند ءِ زُبان یکجا کُت کنت، دری زُبان، دُژمِن ءِ زُبان مئے تہ ءَ چون ءُ چے پیم یکجاھی کار اِیت۔ ھما کہ مئیگ اِیں دُژمِن اِنت، آ کہ دری ُزبان اِنت آ مئے سنگت جوڑ بیت کنت، اے پلسپہ (فلسفہ) ءَ من تنیگہ سرپد نہ باں۔

‏‎گوگی ءِ زُبان ءِ سر ءَ تْران کنگ ءُ وانگ ءَ پد ما کہ بلوچ راج ءِ سر ءِ چمشانکے دئیں گُڑا مرشی مئے دُود ءُ ربیدگ، دپتر، یاداشت، اِزم، ساز ءُ زیمل ءُ کِسّھانی گوم ءَ ھمیش  بُوَگ ءَ اِنت کہ اپریکہ (افریقہ) ءِ تہ ءَ بوتگ۔ مرشی بلوچی زُبان دنیا ءِ ھما زُبانانی تہ ءَ ھوار اِنت کہ گار ءُ بیگواہ بُوَگ ءِ نیمگ ءَ روان اِنت۔ بِہ گندے مردُم اے جیڑ اَنت کہ کروڑانی کِساس ءَ مردُم بلوچی ءَ گپّ ءُ تْران کن اَنت، گُڑا بلوچی چوں گار بوت کنت۔ بلے گوں اُورتی ءَ بچاریں گُڑا ھمُک روش بلوچی گار بوھان اِنت، بلوچی ءِ لبزانی تہ ءَ دری زُبانانی لبر آھگ ءَ اَنت، بلوچ دودمان (کلچر ) گوں دومی دودماناں (کلچراں) مٹّ بوھان اِنت، بلوچی نامانی جاہ ءَ دری نام پِر کنگ بُوَگ ءَ اِنت۔

بلوچ راجدپتر گوں دری گْوستانکاں (تاریخاں) گڑ مڑ کنگ بُوَگ ءَ اِنت ءُ بلے مارا ھوش نیست، اے چیز مدان مدان ءَ گیش بُوَگ ءَ اَنت ءُ ھمُک روش پہ بلوچ ءُ بلوچی ءَ تاوان آرگ ءَ اَنت۔ مرشیگیں بلوچ ورناھاں اے پھمگی اِنت ءُ اِیشی سر ءَ جیڑگ لوٹ اِیت۔ مارا گْوشگ بیت کہ بلوچی وانوک نیست، بلوچی نبشتہ کنوک نیست، یا بلوچی سائنس، آرٹ، میڈیسن، ٹیکنالوجی ءِ زُبان نہ اِنت، پمشکا انگلش وانگ ءُ زانگی اِنت، یا اردو وتی گُٹّ ءِ لوپ جوڑ کنگی اِنت، بلے اگاں ما دنیا ءِ نبشتہ کُتگیں چیزاں وتی زُبان ءِ تہ ءَ رجانک کنگ بندات بِہ کن اِیں، اے کار مئے دزرس ءَ اِنت، چہ اِیشی ءَ  دنیا ءِ اِلم مئے زُبان ءِ تہ ءَ کاینت، ءُ مئے زُبان ھم دیمروئی کنت، راج ھم دیمرورئی کنت۔

‏‎دومی نیمگ ءَ اُردو ءَ مئے مردُم ھمنچو کہ اَرزان ءَ زُورگ ءَ اِنت کہ بِہ گندے اِیشی ءَ ھِچّ تاوان نیست داں دو بلوچ نند اِیت ءُ وت ما وت ءَ ھبر اردو ءَ کنت، چی ءَ کہ یک بلوچے ءِ سیادی چہ جھالاوان ءَ اِنت ءُ دومی ءِ چہ مکران ءُ جھالاوان ءَ اِنت ، یکّے براھوئی نزانت ءُ دومی بلوچی، ایدا اے دلیل دیگ بیت کہ کمیونیکشن ءِ واستا اُردو کنگی اِنت، بلے ما زانگ ءَ نہ اِیں کہ اردو ءُ انگلش مئے زُبان ءَ ھلاس کنگ ءَ اَنت، مئے زُبان ءَ چو رمیز ءَ ورگ ءَ اَنت، گُڑا پرچا ما وتی جند ءِ زُبان ءَ پہ وت ءَ کمونیکشن جوڑ کُت نہ کن اِیں۔

‏‎وھدے دیوان ءِ تہ ءَ اِیوک ءَ بلوچی ءَ ھبر بیت، گُڑا مئے مھلوک گْوش اِیت کہ بلوچی براھوی ءَ گار کنگ ءَ اِنت، یا مردُمانی تہ ءَ پَرکے آرگ ءَ اَنت، یا مردُم پوہ بُوَگ ءَ نہ اَنت، گُڑا مارا گوگی ءِ گپّ وتی زِھن ءَ اِیر کنگی اَنت کہ مئے زُبان مئیگ اِیں، آ بلوچی بہ بیت یا براھوی دوئیں مئے زُبان اَنت، مئے یکجائی ءَ ھمے کُت کن اَنت، اُردو یا انگلش درآمدانی زُبان اَنت، اے مارا گیشتر گِستا کن اَنت۔
‏‎مرشی بلوچی نامانی جاگہ ءَ اَربی نام دیم ءَ آھگ ءَ ءَ اَنت، اَربی وتی جاگہ ءَ مرشی انچیں نام دیم ءَ آھگ ءَ اِنت کہ ھُدا بزانت کہ اے نامانی پجّار چہ کُجام زُبان ءَ اِنت۔ دَرور بَہ کَول ء گوگی ھمے دَیَگ بیت کہ بلوچی ءِ نام اسلامی نام نہ اَنت، پمشکا اَربی نام زُورگی اِنت کہ اسلامی نام اَنت، بلے مارا زانگی اِنت کہ بلوچی نامانی یک وتی پشدر ءُ مانایے ھست، ءُ اے نام گوں مئے پجّار ءَ بندوک اَنت ءُ مئے دپتر ءَ کِسّھاں گوں بندوک اَنت۔ دری نام دری مردُمانی دپتر ءُ پجّار ءِ گوم ءَ وت ءَ سھرا کن اَنت۔

‏‎بیست ءُ یک پروری (فروری) ماتی زُباناںی میان اُستمانی روش زانگ بیت، اے یک سرجمیں دپترے ءِ گوم ءَ ھمگرنچ اِنت کہ گوں بنگالی ورناھانی ھوناں گون نبشتہ کنگ بوتگ کہ راجاں وتی زُبان ءِ رکّینگ ءِ ھاتِر ءَ وتی جند ندْر کُتگ اَنت ءُ دنیا ءِ راجاناں ھمے کلوہ داتگ کہ راجی پجّار گوں زُبان ءَ بندوک اَنت، پجّار رکّینگ ءِ واستا زُبان الم رکّینگی اِنت۔ مرشی بلوچ ھما جاگہ ءَ سر اِنت کہ آئی پجّار گار کنگ بُوَگ ءَ اِنت۔

اے روچ ءَ یک سیمنارے ءِ کنگ درد ءِ دوا نہ اِنت، بلکیں مارا اَمَلی پِڑ ءَ پہ بلوچ پجّار ءِ رکّینگ ءَ جُھد کنگی اِنت، زُبان وتی کنگی اِنت، بلوچی ءُ براھوی دوئیں بلوچ ءِ زُبان اَنت، ھمُک کس، ھمُک دیوان، ھمُک  نبشتانک اے دوئیںنانی تہ ءَ چہ کُجام ھم یکّے ءِ تہ ءَ بہ بیت، مارا پَرک کنگی نہ اِنت، دِگری کنگی نہ اِنت، اے دوئیں مئے راجی زُبان اَنت، وتی زھِن ءَ چہ اُردو ءُ انگلش کشّگی اَنت۔

اردو کیمونیکشن کنگ ءِ واستا المی نہ اِنت، بِہ گندے مارا کمیں وھد ءِ درکار بِہ بیت، کمیں گْرانی پیداک بِہ بیت ءُ جیڑہ بوت کن اَنت، بلے اگاں ما وتی جند ءِ زُبان ءَ وتی کمیونکیشن ءِ دزرس ءُ رسانک جوڑ کنگ ءِ کسانیں جُھدے بِہ کن اِیں،گُڑا آ روش دُور نہ اِنت کہ اُردو شہ مئے سرا چُٹّ اِیت۔

بلے گامگیج مارا زُورگی اِنت، ءُ ھمے مارِشت وتی توک ءَ پیداک کنگی اِنت کہ ھما مارِشت بنگالی ورناھانی پہ وتی زُبان ءَ بوتگ، پہ وتی راج ءُ پہ وتی پجّار ءَ بوتگ۔